ညွန့်ပေါင်းသတင်းလွှာ။ ပုလဲသွယ် နိုင်ငံရေးစာမျက်နှာ။ တင်ပြ-ဆွေးနွေး-ရေးသားချက်များ။ ယမုန်နာ ဆေးခန်း။ ပြည်ထောင်စုအရေး။ ဒေါက်တာတင့်ဆွေ၏ စာများ။ My writings ၁၉၉၀ ရွေးကောက်ပွဲ။

Tuesday, March 3, 2009

ရွေးကောက်ပွဲ (၁ဝ)နှစ်မြောက် အထိမ်းအမှတ်စာအုပ် နိဂုံးချုပ်

ပြည်သူ့လွှတ်တော်ကိုယ်စားပြုကော်မတီ ၏ ပြည်သူ့လွှတ်တော်ရွေးကောက်ပွဲ
(၁ဝ)နှစ်မြောက် အထိမ်းအမှတ်စာအုပ်


နိဂုံးချုပ်

ဤစာတမ်းပါ အခြေအနေများကို သုံးသပ်လျှင် ပြည်သူအား ကတိအထပ်ထပ်ပေး၍ ရွေးကောက်ပွဲ ကျင်းပပေးခဲ့သော အာဏာပိုင်အဖွဲ့အစည်း၊ လွတ်လပ်၍တရားမျှတသော ရွေးကောက်ပွဲ ဖြစ်မြောက်အောင် ဆောင်ရွက်သည်ဟု ဂုဏ်ယူခဲ့သော ပါတီစုံဒီမိုကရေစီ အထွေထွေ ရွေးကောက်ပွဲကော်မရှင်၊ ရွေးကောက်ပွဲတွင် မဲပေးခဲ့ကြသောပြည်သူများ၊ ရွေးကောက်ပွဲတွင် ဝင်ရောက်ယှဉ်ပြိုင်ခဲ့ကြသော နိုင်ငံရေးပါတီများနှင့် တသီးပုဂ္ဂလိကကိုယ်စားလှယ်များ၊ ရွေးကောက်ပွဲတွင် အနိုင်ရရှိခဲ့သော အနိုင်ရပါတီများနှင့် ပြည်သူ့လွှတ်တော် ကိုယ်စားလှယ်များ၏ အခြေအနေအရပ်ရပ်ကို တွေ့မြင်ရမည်ဖြစ်ပေသည်။

(၁၉၉ဝ)ပြည့်နှစ် ပြည်သူ့လွှတ်တော်ရွေးကောက်ပွဲကြီးတွင် မဲပေးခဲ့ကြသော ပြည်သူလူထုကြီးမှာ နှစ်ပေါင်းများစွာ အာဏာရှင်စနစ်ဆိုးအောက်နင်းပြားဘဝမှလွတ်မြောက်ရေးအတွက် မိမိတို့၏ မျှော်လင့်ချက်များကို အကောင်အထည်ဖေါ် ဆောင်ရွက်ပေးနိုင်မည်ဟု မိမိတို့ယုံကြည်သော လူပုဂ္ဂိုလ်၊ အဖွဲ့အစည်းအား အုပ်ချုပ်ရေးတာဝန်ကို ယုံယုံကြည်ကြည်နှင့် အပ်နှင်းလိုက်ခြင်း ဖြစ်ပေသည်။ ထို့အတူ ရွေးကောက်ပွဲတွင် ဝင်ရောက်ယှဉ်ပြိုင် အနိုင်ရရှိခဲ့ကြသော လွှတ်တော် ကိုယ်စားလှယ်များကလည်း အများပြည်သူတို့၏ဆန္ဒနှင့်ကိုက်ညီ၍ အခြေခံ လူ့အခွင့်အရေးများကို အာမခံသည့် စစ်မှန်သော ဒီမိုကရေစီအစိုးရတရပ် ပေါ်ပေါက်ရေးကို စွမ်းစွမ်းတမံ ကြိုးပမ်း ဆောင်ရွက်သွားမည်ဟု ပြည်သူလူထုအား ကတိကဝတ်များ ပေးခဲ့ကြပေသည်။

ရွေးကောက်ပွဲအား ကျင်းပပေးခဲ့သော စစ်အာဏာရှင်အစိုးရကလည်း ရွေးကောက်ပွဲပြီးလျှင် ပြည်သူ့လွှတ်တော် ခေါ်ယူပေးမည်။ အနိုင်ရရှိသောအဖွဲ့အစည်းအား အာဏာလွှဲပြောင်းပေး၍ မိမိတို့၏တာဝန်ဖြစ်သော ကာကွယ်ရေးတာဝန်များကိုသာ ထမ်းဆောင်မည်။ စစ်တန်းလျားသို့ ပြန်မည်ဟု ပြည်သူလူထုအား ကတိအကြိမ်ကြိမ်ပေးခဲ့ပေသည်။ ပါတီစုံဒီမိုကရေစီ အထွေထွေ ရွေးကောက်ပွဲ ကော်မရှင်ကိုလည်း လွတ်လပ်၍ တရားမျှတသောရွေးကောက်ပွဲကြီး အောင်မြင်စွာ ဖြစ်ပေါ်ရေးအတွက် ဖွဲ့စည်းခဲ့ခြင်းဖြစ်သည်ဟု ကြေညာခဲ့ပေသည်။ ဤကဲ့သို့ရွေးကောက်ပွဲကြီး တခုအပေါ်တွင် မျှော်လင့်ချက် အမျိုးမျိုး ထားခဲ့ကြသော ပြည်သူ၊ ကတိကဝတ် အမျိုးမျိုးပေးခဲ့ကြသော အာဏာရှင်စစ်အစိုးရ၊ ဝင်ရောက်ယှဉ်ပြိုင်ခဲ့သော နိုင်ငံရေးပါတီများနှင့် ပြည်သူ့လွှတ်တော်ကိုယ်စား လှယ်တို့သည် မိမိတို့တာဝန်များကို ကျေပွန်ကြပြီလော။ မိမိတို့ပေးခဲ့သော ကတိကဝတ်များကို စောင့်ထိန်းခဲ့ကြပါရဲ့လော။

တရားမျှတမှုရော ရှိပါရဲ့လား။ မိမိတို့မျှော်လင့်တကြီးနှင့် မျှော်ကိုးခဲ့သော အခြေခံလူ့အခွင့်အရေးများအား အပြည့်အဝအာမခံမည့် စစ်မှန်သောဒီမိုကရေစီနိုင်ငံတော်သည်လည်း ပေါ်ထွန်းလာပြီလော။ ရွေးကောက်ပွဲကြီး ကျင်းပပြီးစီး၍ ရွေးကောက်ပွဲရလဒ် ပေါ်ထွက်လာရုံမျှနှင့် ရွေးကောက်ပွဲ အောင်မြင်စွာပြီးဆုံးနိုင်ရေးအတွက် ပါဝင်ဆောင်ရွက်ခဲ့ကြသော အဖွဲ့အစည်း၊ ပြည်သူ နိုင်ငံရေးပါတီများနှင့် လူပုဂ္ဂိုလ်များ၏တာဝန်များသည် မပြီးဆုံးကြသေးပါ။ မိမိတို့ပါဝင်ဆောင်ရွက်ခဲ့ကြသော ရွေးကောက်ပွဲမှ ထွက်ပေါ်လာသည့်ရွေးကောက်ပွဲရလဒ် အကောင်အထည်ပေါ်ပေါက်လာရေးနှင့် ပြည်သူ့လွှတ်တော် ပေါ်ပေါက်ရေးအတွက် အားလုံးတို့တွင် တာဝန်ကိုယ်စီရှိနေကြပေသည်။ ရွေးကောက်ပွဲအား ဦးစီးဦးဆောင် ကျင်းပပေးခဲ့သည့် အာဏာပိုင်များဘက်က မိမိတို့ကတိကဝတ်အတိုင်း ပြည်သူ့လွှတ်တော်ခေါ်ယူပေးရေး အနိုင်ရရှိသော အဖွဲ့အစည်းအား အာဏာလွှဲပြောင်းပေးရေးတို့ကို ဆောင်ရွက်ပြီး မိမိတို့မူလတာဝန်ဖြစ်သော ကာကွယ်ရေးတာဝန်များကို ပြန်လည်ထမ်းဆောင်ရန်လိုပါသည်။

ရွေးကောက်ပွဲတွင်မဲပေးခဲ့ကြသော ပြည်သူများတွင်လည်း မိမိတို့ဆန္ဒမဲကြောင့် ပေါ်ထွက်လာသည့် ရွေးကောက်ပွဲရလဒ် အကောင်အထည်ပေါ်လာရေးအတွက် ဆက်လက်ဆောင်ရွက်ရန် တာဝန်များ ရှိနေပေသည်။ ထို့ပြင် ပါတီစုံဒီမိုကရေစီ အထွေထွေရွေးကောက်ပွဲကျင်းပရေးကော်မရှင်သည်လည်း ကော်မရှင်၏ ကျင့်ဝတ်များနှင့်အညီ မည်သူ တဦးတယောက် ကသော်လည်းကောင်း အဖွဲ့အစည်း တခု ခုကသော်လည်းကောင်း ခြိမ်းခြောက်၍ဖြစ်စေ၊ လာဘ်ပေး၍ဖြစ်စေ မိမိတို့ကျင့်ဝတ်များကို မချိုးဖေါက်၊ ဘက်မလိုက်ပဲ တရားမျှတစွာ ဆောင်ရွက်ရမည့် တာဝန်များကို လိုက်နာဆောင်ရွက်ပြီး ရွေးကောက်ပွဲပြီး၍ အစီရင်ခံစာ တင်ရပါမည်။ ၄င်းနောက် ကော်မရှင်ကို ဖျက်သိမ်းရပါမည်။

ပါဝင်ယှဉ်ပြိုင်ခဲ့သော ပါတီအဖွဲ့အစည်းများကလည်း မိမိတို့ ဝင်ရောက်ယှဉ်ပြိုင်ခဲ့သော ရွေးကောက်ပွဲသည် သမိုင်းဝင် ရွေးကောက်ပွဲ တခုဖြစ်သကဲ့သို့ရွေးကောက်ပွဲလုပ်ထုံးလုပ်နည်းများနှင့်အညီ ဆုံးခန်းတိုင် ရွေးကောက်ပွဲ ရလဒ်များကို အကောင်အထည်ပေါ်စေရန် ဆောင်ရွက်ရမည့်တာဝန်များ ရှိနေသေးပေသည်။ ရွေးကောက်ပွဲတွင် ပြည်သူလူထုမှ ရွေးချယ်တင်မြှောက်ပေးလိုက်သော ပြည်သူ့ လွှတ်တော်ကိုယ်စားလှယ်များသည်လည်း မိမိတို့ မဲဆွယ်စည်းရုံးစဉ်ကာလက ပြည်သူအားပေးခဲ့သော ကတိကဝတ်များနှင့်အညီ တာဝန်ကျေပွန်စွာဆောင်ရွက်၍ ပြည်သူတို့ လိုလားသည့် စစ်မှန်သော ဒီမို ကရေစီနိုင်ငံတော်တရပ် ပေါ်ထွန်းလာရေးအတွက် ဆောင်ရွက်ရပေမည်။ မိမိတို့တာဝန်များကို ထမ်းဆောင်ရာတွင် အခက်အခဲအမျိုးမျိုးကို ကြုံတွေ့ရမည်ဖြစ်သော်လည်း မိမိတို့ လိုလားသော ပန်းတိုင်သို့ရောက်ရန်အတွက် ဇွဲ၊ သတ္တိ၊ လုံ့ လ၊ ဝီရိယတို့ဖြင့် ကြိုးစားရပေမည်။ စည်းလုံးညီညွတ်ရပေမည်။ စွန့်စားရပေမည်။ စွန့်လွှတ်ရပေမည်။ သို့မှသာ မိမိတို့လိုလားသော ဒီမိုကရေစီပန်းတိုင်ကို မလွဲမသွေ ရောက်ရှိမည် ဖြစ်ပေသည်။

လွတ်လပ်ရေးကြိုးပမ်းမှုကာလတွင် လွတ်လပ်ရေးဖခင်ကြီး ဗိုလ်ချုပ်အောင်ဆန်းက- “လွတ်လပ်ရေးသည် သူတောင်းစား၏ ခွက်ထဲသို့ပစ်ချခံရသည့် အသပြာကြေးပြားကဲ့သို့ကျရောက်လာမည့် စွန့်ကျဲခြင်းမျိုးမဟုတ်။ စွန့်စားကြိုးပမ်းဆွတ်ယူရမည့် အောင်ပန်းဖြစ်သည်။” ဆိုသကဲ့သို့အဖွဲ့ချုပ် အထွေထွေအတွင်းရေးမှူးဖြစ်သူ ဒေါ်အောင်ဆန်းစုကြည်က “ဒီမိုကရေစီစနစ်မှာ အမတ်လုပ်ချင်တဲ့သူတွေဟာ အပင်ပန်းအဆင်းရဲခံနိုင်ရမယ်။ အစွမ်းကုန်အလုပ်လုပ်နိုင်ရမယ်။ ကိုယ်ကျိုးမငဲ့ပဲ အများအကျိုးကို ပီပီပြင်ပြင်ကျေကျေပွန်ပွန် ထမ်းဆောင်နိုင်ရမယ်”ဟု ပြောကြားခဲ့ပေသည်။ ဤကဲ့သို့ခေါင်းဆောင်ကြီးများ၏ အဆိုအမိန့်များအတိုင်း အပင်ပန်းခံ၊ အဆင်းရဲခံ၊ အစွမ်းကုန် အလုပ်လုပ်ပြီး ကိုယ်ကျိုးမငဲ့ပဲ၊ အများအကျိုးကို ပီပီပြင်ပြင်ကျေပွန်အောင် ဆောင်ရွက်နိုင်မှသာ ကျွန်ုပ်တို့ မျှော်မှန်းချက် ပန်းတိုင်ဖြစ်သော စစ်မှန်သည့် ဒီမိုကရေစီနိုင်ငံတော်ကြီး ပေါ်ထွန်းလာမည်ဖြစ်သည်။ အားလုံးက မိမိတို့၏ တာဝန်ကိုယ်စီယူကြမှသာ အောင်မြင်ခြင်းသို့ရောက်မည်ဖြစ်ပေသည်၊

တာဝန်ရှိသူများထဲတွင် ရွေးကောက်ပွဲအား ဦးဆောင်ကျင်းပပေးခဲ့သော အာဏာပိုင်စစ်အစိုးရသည် ရွေးကောက်ပွဲ ရလဒ် အကောင်အထည်ဖော်ရေးတွင် အဓိကတာဝန်အရှိဆုံးအဖွဲ့အစည်း ဖြစ်ပါသည်။ မိမိတို့ နိုင်ငံတော် အာဏာကို သိမ်းပိုက်စဉ်က ပြည်သူအားပေးခဲ့သော ကတိကဝတ်များ၊ ရွေးကောက်ပွဲကျင်းပစဉ်ကာလအတွင်း ထုတ်ပြန်ခဲ့သော ဥပဒေ၊ အမိန့်၊ ကြေညာချက်များကို လိုက်နာရ ပေမည်။ ရွေးကောက်ပွဲတခုအား တိုင်းသိ၊ ပြည်သိ၊ ကမ္ဘာသိ၊ ကျင်းပပေးခဲ့ပြီး၊ ရွေးကောက်ပွဲပြီးဆုံး၍ ပြည်သူလူထုက ရွေးချယ်တင်မြှောက်ပေးလိုက်သော ပြည်သူ့လွှတ်တော် ကိုယ်စားလှယ်များ ထွက်ပေါ်လာမှ မိမိတို့ရှေ့ဆက်လုပ်ရမည်တာဝန်ဖြစ်သော ပြည်သူ့လွှတ်တော် ခေါ်ယူ ကျင်းပပေးရေးကို လျစ်လျူရှုထားခြင်းမှာ မလုပ်သင့်မလုပ်အပ်သော ကိစ္စတရပ်ပင်ဖြစ်ပေသည်။

မိမိတို့ပြောခဲ့သော ကတိ စကားများလည်း မတည်၊ မိမိတို့ထုတ်ပြန်ထားသော ဥပဒေ၊ အမိန့်များကိုလည်း မလိုက်နာပဲ ရှေ့ နောက် မညီလုပ်နေလျှင် နိုင်ငံတော်အတွက်သော်လည်းကောင်း၊ ပြည်သူအတွက်သော်လည်းကောင်း၊ ၄င်းတို့အတွက်သော်လည်းကောင်း အကျိုးမရှိနိုင်ပေ။ နိုင်ငံတွင်လည်း တိုးတက်မှုမရှိနိုင်ပေ။ အစိုးရသည်လည်း ဂုဏ်သိက္ခာရှိသောအစိုးရတရပ် မဖြစ်နိုင်ပေ။ ထို့အတူ (ရွေးကောက်ပွဲကော်မရှင်သည်) ပါတီစုံဒီမိုကရေစီအထွေထွေရွေးကောက်ပွဲ ဖြစ်ပေါ်လာရေး အတွက်လည်းကောင်း၊ သမာသမတ်ကျကျ ဆောင်ရွက်ရမည့်အဖွဲ့အစည်းဖြစ်သော်လည်း ရွေးကောက်ပွဲကျင်းပပြီး၍ မိမိတို့တာဝန် ကုန်ဆုံးရမည့် အချိန်တွင် မိမိတို့နှင့် လုံးဝ မသက်ဆိုင်သော အာဏာရှင်စစ်အစိုးရမှထုတ်သမျှ မတရားသော ဥပဒေ၊ အမိန့်၊ ကြေညာချက်ကိုလည်းကောင်း၊ သဘာဝမကျ ယုတ္တိမတန်သောကိစ္စများကိုလည်းကောင်း လိုက်ပါဆောင်ရွက်နေသည်မှာ အရုပ်ဆိုးလှပေသည်။ အာဏာရှင်တို့၏ကြိုးဆွဲရာ လိုက်ပါဆောင်ရွက် နေရသော နောက်လိုက်အဖွဲ့သာလျှင်ဖြစ်နေပေတော့သည်။

မြန်မာနိုင်ငံသည် ကမ္ဘာကုလသမဂ္ဂအဖွဲ့ဝင် နိုင်ငံတနိုင်ငံဖြစ်ကသကဲ့သို့အခြားကမ္ဘာ့နိုင်ငံ များ စုပေါင်းဖွဲ့စည်းထားသော အဖွဲ့များတွင်လည်း အဖွဲ့ဝင်နိုင်ငံတနိုင်ငံဖြစ်၏။ အိမ်နီးချင်း အရှေ့ တောင်အာရှနိုင်ငံများအသင်းတွင်လည်း အဖွဲ့ဝင်နိုင်ငံဖြစ်ပေသည်။ ထို့အပြင် ဘက်မလိုက်အဖွဲ့အစည်းတွင်လည်း ပါဝင်သောနိုင်ငံဖြစ်ပေသည်။ မြန်မာနိုင်ငံ ပါဝင်သော ထိုအဖွဲ့အစည်းများတွင် ကျွန်ုပ်တို့မြန်မာနိုင်ငံကဲ့သို့သော ရွေးကောက်ပွဲကျင်းပပေးပြီး ဆယ်စုနှစ်တခုမျှ ကြာအောင် လွှတ်တော် ခေါ်မပေးသောနိုင်ငံဟူ၍ တနိုင်ငံမျှပင်မရှိချေ။ ခေတ်အဆက်ဆက်လည်း မကြားဖူးခဲ့ပေ။ ရွေးကောက်ပွဲ ကျင်းပ ပေးပြီး ရွေးကောက်ပွဲရလဒ်အား အလေးထားကာ အကောင်အထည်ဖေါ် လွှတ်တော်ခေါ်သည့် နိုင်ငံများသာရှိပေသည်။ တိုင်းပြည်အတွင်းပြည်တွင်းစစ်ဖြစ်နေပါလျက်နှင့် ရွေးကောက်ပွဲကျင်းပပေးပြီး ပြည်သူ့လွှတ်တော်ခေါ်ယူပေးသည့် နိုင်ငံများပင်ရှိ၏။

ကျွန်ုပ်တို့နိုင်ငံတွင်လည်း လက်နက်ကိုင်အဖွဲ့အမျိုးမျိူး တော်လှန်ပုန်ကန်နေသော (၁၉၅ဝ) ခုနှစ်များ၌ပင်လျှင် ရွေးကောက်ပွဲကျင်းပ၍ ပြည်သူ့လွှတ်တော် ခေါ်ယူကျင်းပပေးနိုင်၏။ ယခု ကျွန်ုပ်တို့ နိုင်ငံတွင်အုပ်ချုပ်နေသော စစ်အာဏာရှင်တို့မှာ ‘နှစ်ပေါင်း(၅ဝ)အတွင်း မရရှိခဲ့သေးဖူးသော ငြိမ်းချမ်း ရေးမျိုးလည်းရရှိထားသည်’ဟုပြော၏။ ‘တိုင်းရင်းသားလူမျိုးစု လက်နက်ကိုင်အဖွဲ့အစည်း (၁၇)ဖွဲ့နှင့် ငြိမ်းချမ်းရေးရပြီ’ ဟုလည်းပြော၏။ နိုင်ငံလည်း ငြိမ်းချမ်းသာယာနေပြီဟုလည်းကြေညာ၏။ သို့သော် ရွေးကောက်ပွဲကျင်းပပေးပြီး တဆက်တည်း ဆောင်ရွက်ရမည် ဖြစ်သော ရွေးကောက်ပွဲရလဒ်နှင့်ခွဲခြား၍ မရသော ပြည်သူ့လွှတ်တော်ကိုမူကား ခေါ်ယူမပေးသည့်အပြင် ပြည်သူ့လွှတ်တော်ကိုယ်စားလှယ် များအား မတရားဖမ်းဆီး၏၊ ထောင်ချ၊ ပြန်ပေးဆွဲ၏။ ဤကဲ့သို့လုပ်နေရုံနှင့် တိုင်းပြည်၏ အခက်အခဲ ပြဿနာကို ဖြေရှင်း၍ရနိုင်မည်လော။ လက်နက်နှင့် ခြိမ်းခြောက်၍ မတရားချုပ်နှောင် ဖမ်းဆီးခြင်း၊ မတရားကန့်သတ်တားဆီးခြင်း၊ အတင်းအကြပ်ဖိအားပေး၍ နှုတ်ထွက်စေခြင်း၊ ပြည်သူလူထုအား မထောက်ခံကြောင်း အတင်းအကြပ် လက်မှတ်ထိုးစေခိုင်းခြင်း၊ အတင်းအကြပ် စုဝေးပြီး ဟစ်အော် ခိုင်းခြင်း၊ ယုတ္တိယုတ္တာမရှိသော လူထုစည်းဝေးပွဲများ ပြုလုပ်နေခြင်းဖြင့် မိမိတို့ကိုယ်တိုင် ကျင်းပပေးခဲ့သော ရွေးကောက်ပွဲကြီး ပေါ်ထွက်လာသော ရွေးကောက်ပွဲရလဒ်ကြီးက ပျောက်ပျက်သွားမည် လော။ မပျောက်ပျက်နိုင်ပါ။ ရွေးကောက်ပွဲရလဒ်ဆိုသည်မှာ မိမိတို့လိုသလို ဖြစ်မလာလျှင် မလိုသလို ဖျက်ပစ်၍လည်းရသောအရာမဟုတ်ချေ၊ ထို့ပြင် ရွေးကောက်ပွဲတွင် ပြည်သူလူထုအပါအဝင် မိမိတို့ တပ်မတော်သားများပါ မျှော်လင့်ခြင်းကြီးစွာဖြင့် မဲပေးခဲ့သည်ကို အာဏာပိုင်များက သတိပြုသင့်ပါ သည်။ မဖြစ်နိုင်သော ပိတ်ပင်တားဆီး၊ ဖျက်ဆီးမှုမျိုးစုံကို အစွမ်းကုန်ဆက်၍ လုပ်နေပါလျှင် မည်သူ့ အတွက်မျှ အကျိုးမရှိပဲ တိုင်းပြည်နှင့် ပြည်သူသာ နစ်နာရမည်ဖြစ်၏။ ထိုတိုင်းပြည်တွင် နေထိုင်ကြ သော ပြည်သူများထဲတွင် မိမိတို့လည်း ပါဝင်နေသည်ကို သတိပြုအပ်ပေသည်။

လက်ရှိနိုင်ငံတော်အာဏာကိုကိုင်စွဲထားသော အဖွဲ့အစည်းတရပ်အနေနှင့် တိုင်းပြည်၏ လက်ရှိရင်ဆိုင်နေရသော အခက်အခဲ အကြပ်အတည်းများကို ဖြေရှင်းနိုင်ရန် တွေ့ဆုံဆွေးနွေးရေးနည်း မှတပါး အခြားနည်းလမ်းမရှိချေ။ ဤတွေ့ဆုံဆွေးနွေးရေးကိုလည်း ရှောင်ရှား၍မရနိုင်ပေ။ ယနေ့ ကမ္ဘာ ပေါ်တွင် လူပေါင်းမြောက်များစွာ သေကြေပျက်စီးစေခဲ့သည့် လူမျိုးရေးစစ်ပွဲများ၊ ဘာသာရေးစစ်ပွဲများ၊ နယ်မြေလုစစ်ပွဲများ နှစ်ပေါင်းများစွာ ဖြစ်ပွါးခဲ့ကြသော်လည်းအောင်မြင်မှုမရရှိပဲ နှစ်ဦးနှစ်ဖက် ကြေပြုန်းခဲ့ ကြရပြီး နောက်ဆုံး မျက်နှာချင်းဆိုင် တွေ့ဆုံဆွေးနွေးခြင်းဖြင့်သာ အဖြေရှာရရှိသည်မှာ လက်တွေ့ပင် ဖြစ်သည်။ ယနေ့တိုင်းပြည်တွင် ဖြစ်ပေါ်နေသော အခက်အခဲများကို ဖြေရှင်းနိုင်ရန်မှာ တွေ့ဆုံဆွေးနွေး ရေးမှလွဲ၍ တခြားနည်းလမ်းမရှိသည်ကို ပြည်သူများကလည်း ယုံကြည်ကြသည်။ အမြန်ဆုံး တွေ့ဆုံ ဆွေးနွေးမှုကိုလည်း လိုလားကြသည်။ သို့သော် အာဏာပိုင်တို့သည် ပြည်သူတို့၏ ဆန္ဒဖြစ်သော ရွေး ကောက်ပွဲရလဒ်ကို လျစ်လျူရှု၏။ ပြည်သူလူထုက ရွေးကောက်တင်မြှောက်ပေးလိုက်သော ပြည်သူ့ လွှတ်တော် ကိုယ်စားလှယ်များကိုလည်း မတရားချုပ်နှောင်ဖမ်းဆီး၏။ တွေ့ဆုံဆွေးနွေးရေးကိုလည်း အကြောင်းအမျိုးမျိုး ပြ၍ရှောင်ရှားပြီး ချေမှုန်းရေးစကားကိုသာတွင်တွင်ကြီးပြောနေ၏။ ပြည်သူ့ဆန္ဒကို ဆန့်ကျင်ကာ ချေမှုန်းရေးကို လုပ်ဆောင်နေခြင်းသည် ပြည်သူကို ချေမှုန်းခြင်းဖြစ်ပေသည်။ ထိုသို့သော ချေမှုန်းရေးလမ်းစဉ်ကို ကျင့်သုံးနေသမျှ ကာလပတ်လုံး တိုင်းပြည်အတွင်း ကြုံတွေ့နေရသော ပြဿနာများကလည်း ပြေလည်သွားမည်မဟုတ်ချေ။ တိုင်းပြည်လည်း ခေတ်မီတိုးတက်လာမည်မဟုတ်ချေ။

အမျိုးသားဒီမိုကရေစီအဖွဲ့ချုပ်သည် မည်သို့ပင် အခက်အခဲအတားအဆီးအဖျက်အဆီးမျိုးစုံ ကို ကြုံတွေ့နေစေကာမူ ခိုင်မာသော ဇွဲ၊ သတ္တိ၊ လုံ့လ၊ ဝီရိယတို့ကိုဆုပ်ကိုင်၍ နိုင်ငံရေးပါတီဖွဲ့စည်း တည်ထောင်စဉ်ကာလက ရေးဆွဲပြဋ္ဌာန်းခဲ့သော အဖွဲ့ချုပ်၏ သဘောထား ကြေညာချက်များအရ လည်းကောင်း၊ (၁၉၉ဝ)ပြည့် ပါတီစုံဒီမိုကရေစီ အထွေထွေ ရွေးကောက်ပွဲတွင် ပြည်သူကိုပေးခဲ့သောကတိ ကဝတ်များဖြစ်သည့် ရွေးကောက်ပွဲကြေညာစာတမ်းပါ အချက်များ အရလည်းကောင်း၊ ဆက်လက် ဆောင်ရွက်သွားမည်ဖြစ်ပြီး ပြည်သူ့လွှတ်တော်ခေါ်ယူပေးရန် တာဝန်ရှိသော အာဏာပိုင်များမှ မိမိတို့ တာဝန်ကိုပျက်ကွက်ကာ လွှတ်တော်ခေါ်ယူပေးခြင်းမရှိ၍ ပေါ်ပေါက်လာသော ပြည်သူ့လွှတ်တော် ကိုယ်စားပြုကော်မတီနှင့်အတူ ပြည်သူ့လွှတ်တော်တရပ်ပေါ်ပေါက်ရေးနှင့် စစ်မှန်သောဒီမိုကရေစီစနစ် နှင့် ဒီမိုကရေစီ နိုင်ငံတော် ပေါ်ထွန်းလာရေးအတွက် မဆုတ်မနစ် အစွမ်းကုန်ကြိုးပမ်းဆောင်ရွက် ဆက်လက် တိုက်ပွဲဝင်သွားမည် ဖြစ်ပေသည်။ ။

“ပြည်သူ့လွှတ်တော်၊ ဒီမိုကရေစီအစိုးရနှင့် ဒီမိုကရေစီနိုင်ငံတော် မုချပေါ်ထွန်းရမည်။”

No comments:

Post a Comment