ညွန့်ပေါင်းသတင်းလွှာ။ ပုလဲသွယ် နိုင်ငံရေးစာမျက်နှာ။ တင်ပြ-ဆွေးနွေး-ရေးသားချက်များ။ ယမုန်နာ ဆေးခန်း။ ပြည်ထောင်စုအရေး။ ဒေါက်တာတင့်ဆွေ၏ စာများ။ My writings ၁၉၉၀ ရွေးကောက်ပွဲ။

Monday, March 2, 2009

ရှမ်းအမျိုးသားတဦး၏ ရွေးကောက်ပွဲအပေါ် အထင်အမြင်

ပြည်သူ့လွှတ်တော်ကိုယ်စားပြုကော်မတီ ၏ ရွေးကောက်ပွဲ (၁ဝ)နှစ်မြောက် အထိမ်းအမှတ်စာအုပ်မှ ကောက်နုတ်စာ။

(၁၉၉ဝ)ပြည့်နှစ် ပါတီစုံဒီမိုကရေစီအထွေထွေရွေးကောက်ပွဲကြီးတွင် ပြည်သူ့လွှတ်တော်ကိုယ်စားလှယ်အဖြစ် ပါဝင်အရွေးခံခဲ့ခြင်းမရှိသော မဲဆန္ဒရှင်တဦးဖြစ်သည့် ရှမ်းအမျိုးသားတဦး၏ ရွေးကောက်ပွဲအပေါ် အထင်အမြင်

ကျနော်ဟာ ရွေးကောက်ပွဲနဲ့ပတ်သက်တဲ့ စစ်အာဏာပိုင်တွေရဲ့ကတိကဝတ်တွေကို အမှန်ဘဲ ယုံကြည်မိခဲ့ပါတယ်။ သူတို့ဟာ စစ်တပ်မှာ ကြီမားတဲ့ရာထူးတာဝန်တွေကို ယူထားကြတယ်။ တိုင်းပြည်ရဲ့အာဏာတွေကို သိမ်းယူထားပါတယ်။ အခုတခါ တိုင်းပြည်နဲ့လူမျိုးအတွက် တာဝန်ရှိလာပြန်တော့ အမှန်တကယ်ဘဲ ဖြောင့်ဖြောင့်မတ်မတ်၊ မှန်မှန်ကန်ကန် လုပ်ကြမှာဘဲလို့ ကျနော်ထင်မိတယ်။ ကိုယ်ချင်းစာကြည့်ပါတယ်။ မိမိကိုယ်တိုင်လည်း တိုင်းပြည်နဲ့လူမျိုးအတွက် တာဝန်ရှိသလောက် ဆောင်ရွက်ခဲ့ရာမှာ မှန်မှန်ကန်ကန် ရိုးရိုးဖြောင့်ဖြောင့် ဆောင်ရွက်ခဲ့ပါတယ်။

ကျနော်တို့က တိုင်းရင်းသားတွေဆိုတော့ ကျနော်ထင်ပါတယ် ဘယ်တိုင်းရင်းသားဘဲဖြစ်ဖြစ် ပြေပြေလည်လည် ညီညီညွတ်ညွတ် အေးအေးချမ်းချမ်းနဲ့ လူမျိုးတကာတို့ရဲ့ ညီညွတ်မျှတတဲ့ ပြည်ထောင်စုအတွင်းမှာ နေချင်ကြပါတယ်။ တကယ်တော့ ကျနော်တို့မြန်မာနိုင်ငံဟာ ဧရာဝတီမြစ်ကြီးကို ဗဟိုပြုပြီးတော့ ပထဝီဒေသအရ တည်ဆောက်ထားပုံကိုက တိုင်းရင်းသားအားလုံး စုစုစည်းစည်းနေကြ ဖို့မဟုတ်လား။

ကျနော်က စစ်အာဏာပိုင်တွေ ပြဌာန်းထုတ်ဝေတဲ့ ရွေးကောက်ပွဲဥပဒေကို လေ့လာကြည့်တော့ ‘ပြည်သူ့လွှတ်တော် ရွေးကောက်ပွဲ’လို့ တိတိကျကျပြဌာန်းထားတာတွေ့ရလို့ သိပ်ဝမ်းသာသွားတယ်။ ငါတို့တိုင်းရင်းသားတွေ၊ ပြည်ထောင်စုသားတွေ လွတ်လပ်ခြင်း၊ ညီမျှခြင်း၊ တန်းတူခြင်းဆိုတဲ့ လောကစောင့်တရားနဲ့အညီ တောင်ပေါ်/မြေပြန့်၊ လူနည်းစု/လူများစု မခွဲခြားဘဲ ဒီမိုကရေစီပြည်ထောင်စုကြီး ဖြစ်လာတော့မယ်၊ ရွေးကောက်ပွဲကြီးပြီးတာနဲ့ ပြည်သူ့လွှတ်တော်ကြီးပေါ်ထွန်းလာပြီး တိုင်းရင်းသားများအရေးတွေကို ပါလီမန်လွှတ်တော်ကြီးမှာ တင်ပြဆွေးနွေးနိုင်တော့မယ်လို့ ယုံကြည်ပြီး ဗိုလ်ချုပ်ကြီးများကို ကျနော် အတော့်ကို လေးစားအထင်ကြီးသွားမိပါတယ်။

ဒီလိုနဲ့ ရွေးကောက်ပွဲကျင်းပတဲ့ကာလ ရောက်လာပါတော့တယ်။ ရွေးကောက်ပွဲမှာ ယှဉ်ပြိုင်ကြမယ့် နိုင်ငံရေးပါတီ အသီးသီးကလည်း ရွေးကောက်ပွဲကြေညာစာတမ်းတွေ ထုတ်ကြပါတယ်။ ကျ နော်တို့လည်း ပါတီတွေရဲ့သဘောထားကို လေ့လာပါတယ်။ အဲ- အမျိုးသားဒီမိုကရေစီအဖွဲ့ချုပ်ရဲ့ ရွေးကောက်ပွဲကြေညာစာတမ်းမှာ တိုင်းရင်းသား လူမျိုးများ အရေးနဲ့ပတ်သက်တဲ့ အဖွဲ့ချုပ်ရဲ့သဘောထား ပါပါတယ်။ ကျနော်တို့ဖတ်ကြည့်တယ်။ အချင်းချင်းဆွေးနွေးတယ်။ ကျနော်တို့ လက်ခံတယ်။ သဘောကျတယ်။ ယုံကြည်တယ်။ ဒီတော့ မဲထည့်ချိန်လည်း ရောက်ရော အမျိုးသားဒီမိုကရေစီ အဖွဲ့ချုပ်က ပြည်သူ့ကိုယ်စားလှယ်လောင်းကို တကယ့်ကို စိတ်အားထက်သန်စွာနဲ့ ယုံယုံကြည်ကြည် မဲပေး လိုက်ပါတယ်။

ရွေးကောက်ပွဲပြီးတော့ အမျိုးသားဒီမိုကရေစီအဖွဲ့ချုပ်ကလည်း အနိုင်ရတယ်။ စစ်အာဏာပိုင်များကလည်း သေချာပေါက်ကို ကမ္ဘာသိအောင် ကတိတွေပေးထားတာဆိုတော့ ကျနော်တို့ သိပ်ပျော်တာပေါ့။ ကတိတွေကတော့- ပြည်သူလူထုက လွတ်လပ်စွာရွေးချယ်တင်မြှောက်ဖွဲ့စည်းလိုက်တဲ့ အစိုးရအဖွဲ့အစည်းထံ နိုင်ငံတော်ရဲ့အာဏာကို လွှဲပြောင်းပေးပြီးတာနဲ့ စစ်တပ်ရဲ့မူလတာဝန်ဖြစ်တဲ့ ကာကွယ်ရေး၊ တရားဥပဒေစိုးမိုးရေး-အစရှိတာတွေကို ဆောင်ရွက်သွားမယ်၊ ရွေးကောက်ပွဲပြီးတာနဲ့ ဥပဒေနဲ့အညီ အစိုးရဖွဲ့ကြ-အစရှိတာတွေဖြစ်ပါတယ်။ စစ်ဗိုလ်ချုပ်ကြီးများကိုလည်း ကတိတွေအရ လုပ်ဆောင်ပေးမယ်ဆိုရင် ကျနော်တို့တတွေ ကျေးဇူးတင်ကြရမှာပါ။

ဒီလိုနဲ့ တနှစ်၊ နှစ်နှစ်- အခု ဆယ်နှစ်ရှိလာပြီပေါ့။ “ကျုပ်တို့က စစ်သားဗျ။ ပြတ်ပြတ်ပြော တတ်တယ်။ ပြောတဲ့အတိုင်း လုပ်တယ်”ဆိုတဲ့ စစ်သားတွေ ပြောလေ့ရှိတဲ့စကားအတိုင်း မဟုတ်တော့ ဘဲ ပြတ်ပြတ်ပြောပြီးတော့ ပြောတဲ့အတိုင်း မလုပ်တာတွေကိုတွေ့ရပါတယ်။ လွှတ်တော်ခေါ်ဖို့ အခြေခံ ဥပဒေရေးရဦးမယ်။ ဥပဒေမူကြမ်းရေးဖို့ ညီလာခံလုပ်ရဦးမယ်-ဆိုတာတွေ ပြောလာတယ်။ နိုင်ငံတော် ငြိမ်ဝပ်ပိပြားမှုတည်ဆောက်ရေးအဖွဲ့ကနေ နိုင်ငံတော် အေးချမ်းသာယာရေးနှင့် ဖွံ့ဖြိုးရေးကောင်စီတွေ ဘာတွေလို့တောင် နာမည်ပြောင်းသွားပြီ။ “ဘယ်မှာလဲ ပြည်သူ့လွှတ်တော်”။ ကျနော် အလေး အ နက်ပြောချင်တယ်။ တိုင်းပြည်မှာအုပ်ချုပ်တဲ့သူတွေ ကတိပျက်ရင် တိုင်းပြည်ပါ ပျက်တတ်တယ်။

ဒီလိုမျိုး ကမ္ဘာ့အလယ်မှာ သိက္ခာကျစရာကိစ္စမျိုးကို စစ်အာဏာရှင်တွေ မလုပ်သင့်ဘူး။ အမှန်ကတော့ သူတို့က ကတိအတိုင်း လွှတ်တော်ခေါ်မပေးလို့ တိုင်းပြည်မှာ ပြဿနာပေါင်းစုံနဲ့ ရင်ဆိုင်နေရတာပါ။ နိုင်ငံရေးမပြေလည်ဘူး။ စီးပွားရေး ကျဆင်းနေတယ်။ ပြည်သူပြည်သားတွေ မွဲတေနေကြတယ်။ လူမှုရေး ယုတ်လျော့ပျက်စီးနေတယ်။ ကျောင်းသားတွေ အထက်တန်းပညာ မသင်ယူနိုင်ဘူး။ ဝန်ထမ်းတွေ ခြစားနေတယ်။ နိုင်ငံတကာဆက်ဆံရေး ပျက်ယွင်းနေတယ်။ အမျိုးသားရေးဂုဏ်သိက္ခာ ကျဆင်းနေတယ်။ အရေးကြီးလှတဲ့ တိုင်းရင်းသားလူမျိုးများအရေး ဒီနေ့ထိ ပြေပြေလည်လည်ဆွေးနွေး ညှိနှိုင်းမှု မရှိသေးဘူး။ ပြည်သူလူထုဟာ ငရဲခံနေရသလိုပါဘဲ။

ဒါပေမယ့် ဒါတွေအားလုံးဟာ ချက်ချင်းပြေလည်သွားနိုင်တယ်လို့ ကျနော်ယုံကြည်တယ်။ ‘လာချင်ရင် အနီးလေး၊ မလာချင်ရင် ခရီးဝေး’ဆိုတာမျိုးပေါ့။ သူတို့သာ ဆန္ဒရှိမယ်ဆိုရင် စစ်အာဏာ ပိုင်တွေရယ်၊ တိုင်းရင်းသားလူမျိုးတွေရယ်၊ ဒီမိုကရေစီအင်အားစုတွေရယ် တကယ့်စိတ်ကောင်း စေတ နာအရင်းခံနဲ့ တွေ့ဆုံဆွေးနွေးလိုက်ရင် တိုင်းပြည်အတွက်ရော သူရောကိုယ်ပါဆိုသလို အကုန်လုံး အ ဆင်ပြေသွားမယ်။ ဒါ သေချာတယ်။ တွေ့ဆုံဆွေးနွေးလျှင် မည်သူမှ အရှုံးနှင့် ရင်ဆိုင်ရမည် မဟုတ်ပါ။ ဒါ့ အပြင် တိုင်းပြည်က လိုအပ်နေတဲ့ ပန်းတိုင်ကို ရောက်ကြရမယ်ဖြစ်ပါတယ်။ ဒါတွေဟာ ကျနော်တဦး တည်းမဟုတ်၊ တိုင်းရင်းသားလူမျိုးစုအားလုံးရဲ့ ပြင်းပြတဲ့ဆန္ဒဖြစ်ပါတယ်။ ခက်တာက သူတို့က ဘာ့ကြောင့် မဆွေးနွေးချင်တာလဲဆိုတာကို မစဉ်းစားတတ်အောင်ပါဘဲ။ ။

No comments:

Post a Comment