ညွန့်ပေါင်းသတင်းလွှာ။ ပုလဲသွယ် နိုင်ငံရေးစာမျက်နှာ။ တင်ပြ-ဆွေးနွေး-ရေးသားချက်များ။ ယမုန်နာ ဆေးခန်း။ ပြည်ထောင်စုအရေး။ ဒေါက်တာတင့်ဆွေ၏ စာများ။ My writings ၁၉၉၀ ရွေးကောက်ပွဲ။

Monday, March 2, 2009

(၁၉၉ဝ)ပြည့်နှစ်မှ(၂ဝဝဝ)ပြည့်နှစ်အထိ ဆယ်မိုးဆယ်နွေ မြန်မာပြေ - မဲဆန္ဒရှင် ပြည်သူတဦး

ပြည်သူ့လွှတ်တော်ကိုယ်စားပြုကော်မတီ ၏ ရွေးကောက်ပွဲ (၁ဝ)နှစ်မြောက် အထိမ်းအမှတ်စာအုပ်မှ ကောက်နုတ်စာ။
(၁၉၉ဝ)ပြည့်နှစ်မှ(၂ဝဝဝ)ပြည့်နှစ်အထိ ဆယ်မိုးဆယ်နွေ မြန်မာပြေ - မဲဆန္ဒရှင် ပြည်သူတဦး

ပါတီစုံဒီမိုကရေစီအထွေထွေရွေးကောက်ပွဲကြီး ပြီးခဲ့သည်မှာ ဆယ်မိုးဆယ်နွေရှိခဲ့ပေပြီ။ ထိုစဉ်က ရွေးကောက်ပွဲကြီး ပြီးလျှင် အနိုင်ရပါတီက ဦးဆောင်ပြီး ဒီမိုကရေစီပြုပြင်ပြောင်းလဲမှုများကို ပြုလုပ်ပါ၊ မိမိတို့စစ်တပ်က စစ်တန်းလျားကို ပြန်ပါမည်ဟု စစ်အာဏာရှင်တို့က မျက်နှာပြောင်ပြောင်နှင့် ကတိပေးထားသည်ကို လူတိုင်း သတိရ မှတ်မိကြမည် ဖြစ်သည်။

သို့သော် ရွေးကောက်ပွဲပြီး၍ ဆယ်နှစ်ကြာသည့်တိုင် မိမိတို့၏ကတိအတိုင်း ရွေးကောက်ပွဲရလဒ်ကို ဖြောင့်မတ်စွာ အကောင်အထည် ဖော်မပေးဘဲ စစ်အာဏာရှင်တို့သည် ကွေ့ကွေ့ကောက်ကောက်၊ တောင်တောင်ဤဤ ပြောဆို၍ ပြည်သူလူထုကို လိမ်ညာ လှည့်ဖျားထားသည်မှာ အရှက်တရား ကင်းလေစွဟုသာ မှတ်ချက်ချရပေမည်။

ဤသို့ဆိုလျှင် စစ်အာဏာရှင်များက အဘယ့်ကြောင့် ပါလီမန်ဒီမိုကရေစီ အထွေထွေရွေး ကောက်ပွဲကြီးကို ကမ္ဘာသိ ပြုလုပ်ပေးခဲ့ပါသနည်း။ စောကြောဖွယ်ရာပင်ဖြစ်သည်။ စင်စစ် (၁၉၉ဝ)ပြည့်နှစ် ပါတီစုံဒီမိုကရေစီ အထွေထွေ ရွေးကောက်ပွဲကြီး ကျင်းပပေးခဲ့သည်မှာ မရှောင်လွှဲသာ၍ ပြုလုပ်ပေးခဲ့ရခြင်းသာဖြစ်သည်။ ထိုအချိန်တွင် တိုင်းပြည်ကို မည်သို့လိမ်လည်လှည့်ဖျား ပြောဆိုလုပ်ကိုင်ရမည်ကို စစ်အာဏာရှင်တို့ ကောင်းစွာမသိကြသေးချေ။

ထို့ကြောင့် မဆလအမွေခံ တစညပါတီကို ဖန်တီးတည်ထောင်ပြီး တဖက်သတ်အခွင့်အရေးပေး စည်းရုံးလှုပ်ရှားစေခဲ့သည်။ ဒီမိုကရေစီအင်အားစုများကို ဖိနှိပ်ကန့်သတ်ဟန့်တားသည်။ အထူးသ ဖြင့် အမျိုးသားဒီမိုကရေစီအဖွဲ့ချုပ်ကို အကြောင်း မျိုးစုံရှာ၍ ဟန့်တားနှောက်ယှက်သည်။ ဤသို့ညစ် ပတ်ကောက်ကျစ်ထားပြီးဖြစ်သဖြင့် ရွေးကောက်ပွဲတွင် အမျိုးသားဒီမိုကရေစီအဖွဲ့ချုပ်က အပြတ်အသတ် အနိုင်ရရှိလိမ့်မည်ဟု ၄င်းတို့ မထင်မိ။ ပြည်သူလူထု၏ သဘောထားအမှန်ကို စစ်အာဏာရှင်တို့ အမှန်အတိုင်း မတွက်တတ်ခဲ့ချေ။

ဤသို့ဖြင့် ပါတီစုံဒီမိုကရေစီအထွေထွေရွေးကောက်ပွဲကြီးကို ကျင်းပခဲ့ရာ အမျိုးသားဒီမိုကရေစီအဖွဲ့ချုပ်က အပြတ်အသတ် အနိုင်ရတော့သည်။ ကြည်း၊ ရေ၊ လေ တပ်မတော်သားများ၊ ရဲအဖွဲ့ဝင်များ- စသည့် လက်နက်ကိုင် အင်အားစုများကပင်လျှင် အဖွဲ့ချုပ်အား ပုံအော၍ ဆန္ဒမဲ ပေးခဲ့ကြသည်။ ပြည်သူလူထုသည် တပါတီအာဏာရှင်စနစ်နှင့် စစ်တပ်၏ လွှမ်းမိုးမှုကို မည်မျှ စက်ဆုပ်ရွံရှာကြောင်း၊ မလိုလားတော့ကြောင်း အထင်အရှားပြသခဲ့သည်။ အမျိုးသားခေါင်းဆောင်ကြီး ဗိုလ်ချုပ်အောင်ဆန်းနှင့် သမီးဒေါ်အောင်ဆန်းစုကြည်အပေါ် မည်မျှချစ်ခင်မြတ်နိုး လေးစား ယုံကြည်ကြောင်းကို အထင်အရှားပြသခဲ့သည်။

စစ်အာဏာရှင်များ အကြီးအကျယ် ထိတ်လန့်တုန်လှုပ်သွားတော့သည်။ “ခိုးချင်တာလည်း ပျာလို့၊ လက်နှေးတာလည်း ချာလို့”ဆိုသည့်စကားအတိုင်း သူခိုး လက်နှေးသဖြင့် အလုပ်မဖြစ်သကဲ့သို့ပင် စစ်အာဏာရှင်တို့၏ အကြံအစည် စိတ်ကူးများ မအောင်မမြင်ဖြစ်ခဲ့ရသည်။

တစည၏ ဘဝအခြေအနေကိုလည်း စစ်အာဏာရှင်တို့ သဘောပေါက်သွားသည်။ အားကိုး၍ သုံးစားမရနိုင်တော့။ (၁၉၆၂)ခုနှစ်မှစတင်၍ တိုင်းပြည်နှင့်တိုင်းရင်းသားပြည်သူလူထုအပေါ် စစ်တပ်က အနိုင့်အထက် အလွန်အကျွံ ပြုလုပ်ထားမှုများကလည်း ရှိနေသည်။ တဖန် အမွေးခံထားရသော စစ် ခေါင်းဆောင်များဖြစ်ကြသဖြင့် ပြည်သူလူထု၏ မျက်နှာထက် ၄င်းတို့အရှင်သခင်၏ မျက်နှာကို ပိုမို ထောက်ထားခြင်းသည် ၄င်းတို့အတွက် သစ္စာတရားဖြစ်၏။ ထို့ပြင် အမျိုးသားဒီမိုကရေစီအဖွဲ့ချုပ် အာဏာရသွားလျှင် ၄င်းတို့၏အနာဂတ် ပျောက်ဆုံးသွားနိုင်သည်ဟု စစ်အာဏာရှင်များ ကြောက်ရွံ့ နေပုံရသည်။ ဒီမိုကရေစီ သက်ဝင်ယုံကြည်သူများသည် ၄င်းကဲ့သို့ အရှင်သခင်၏ အမွေးခံများမဟုတ်။ လူ့အဖွဲ့အစည်းအကျိုးအတွက် လွတ်လပ်စွာ တွေးခေါ်ယုံကြည်ဆောင်ရွက်ရဲသူများဖြစ်သည်ကို မသိကြသဖြင့် ကြောက်စိတ်ဝင်ကာ ၄င်းတို့အာဏာလက်မလွှတ်ရေးအတွက် ဆက်လက်ပြီးမိုက်လုံးကြီးရန် ဆုံးဖြတ်လိုက်ပုံရသည်။

ရွေးကောက်ပွဲတွင် အမျိုးသားဒီမိုကရေစီအဖွဲ့ချုပ်က အပြတ်အသတ်အနိုင်ရလိုက်သဖြင့် ပြည်သူလူထုကြီးမှာ ဝမ်းသာမဆုံး တပြုံးပြုံးဖြစ်နေသည်။ နောင်ရေးအတွက် စိတ်အေးနေကြသည်။ ရွေးကောက်ပွဲရလဒ်ကို စိတ်ချယုံကြည်နေကြသည်။ စစ်အာဏာရှင်များ၏ အကောက်ဉာဏ်နှင့် နောက်ဆက်တွဲ နှောက်ယှက်လာမည့်အရေးကို တွေးတောမိကြပုံမရချေ။ စင်စစ်အားဖြင့် မဲဆန္ဒရှင် ပြည်သူအများစုအနေဖြင့် နိုင်ငံရေးအတွေ့အကြုံမရှိဟု ဆိုရမည်ဖြစ်သည်။ မဆလခေတ် တလျှောက်လုံးတွင် ပြည်သူ/ပြည်သားများသည် နိုင်ငံရေးအတွေ့အကြုံကို ဖြတ်သန်းခဲ့ကြသည်မဟုတ်။ စစ်အာဏာရှင်တို့၏ တပါတီစနစ်အောက်တွင် ထားသလိုနေ၊ စေရာသွား၊ ခိုင်းတာလုပ်ဘဝဖြင့် နိုင်ငံရေးဝန်ထမ်းဘဝ၊ နိုင်ငံ ရေး အစေခံဘဝကိုသာ ဖြတ်သန်းခဲ့ကြဖူးသည်။ ပါတီစုံ နိုင်ငံရေး အတွေ့အကြုံမရှိကြသဖြင့် ရွေးကောက် ပွဲရလဒ်ကို အမြန်ဆုံးအကောင်အထည်ဖော်ရန် မည်သို့ပူးပေါင်း ဆောင်ရွက်ရမည်ကို မသိသေးဘဲ ရှိနေသည်။ ထိုအချိန်တွင် အဖွဲ့ချုပ် အထွေထွေအတွင်းရေးမှူး ဒေါ်အောင်ဆန်းစုကြည် ကိုယ်တိုင်မှာလည်း စစ်အာဏာရှင်တို့၏ မတရားဖမ်းဆီး အကျယ်ချုပ်ချထားခြင်းကို ခံနေရသည်။

ဤအခြေအနေကို စစ်အာဏာရှင်တို့က အခွင့်ကောင်းယူကာ ရွေးကောက်ပွဲရလဒ်ကို ဥပဒေ၊ စည်းကမ်း၊ ထုံးတမ်း စဉ်လာများနှင့်အညီ အကောင်အထည်ဖော်မပေးတော့ရုံမျှမက ဒီမိုကရေစီ အင်အားစုများအပေါ် သွေးထိုးစမ်း၍ ကျူးကျော်စော်ကား ဖိနှိပ်ချုပ်ချယ်မှုများ ပြုလုပ်လာတော့သည်။ ပါလီမန်လွှတ်တော် ခေါ်ယူဖွဲ့စည်းရေးအတွက် ကျင်းပသော ပါတီစုံဒီမိုကရေစီ အထွေထွေရွေးကောက် ပွဲကိုပင် ဖွဲ့စည်းအုပ်ချုပ်ပုံအခြေခံဥပဒေ ရေးဆွဲရန်သာ ပြုလုပ်ပေးသည့် ရွေးကောက်ပွဲဟု အရှက်မရှိ ဗြောင်လိမ်၍ပြောဆိုလာသည်။ အမျိုးသားညီလာခံဆိုသည်ကို အနိုင်ကျင့်၍ ဇွတ်အတင်းခေါ်ယူသည်။ စစ်တပ်က နိုင်ငံရေးတွင် အမြဲတမ်း အပေါ်စီးယူ လွှမ်းမိုးထားဖို့ အရှက်မရှိ အဓမ္မ ကြံစည်သည်။ ‘သား’ကတလှည့် ‘အဖေ’လုပ်လိုသော မကြံကောင်းမစည်ရာကိစ္စမျိုးဖြစ်သည်။

(၁၉၉ဝ)ပြည့်နှစ် ဇူလိုင်လအတွင်း ဂန္ဓီခန်းမ အစည်းအဝေးခေါ်ယူစဉ်က အမျိုးသားဒီမိုကရေ စီအဖွဲ့ချုပ်အနေဖြင့် လုပ်သင့် လုပ်ထိုက်သောကိစ္စကို ဆုံးဆုံးဖြတ်ဖြတ်၊ ရွပ်ရွပ်ချွန်ချွန်လုပ်ခဲ့ကြမည် ဆိုလျှင် ယနေ့မြန်မာပြည်၏ အခြေအနေသည် ယ္ခုလို ဂုဏ်သိက္ခာ ကျနေသော အနာဂတ်မဲ့နိုင်ငံအဖြစ် ရောက်ရှိနေမည်မဟုတ်ချေ။ အရူးလက်ထဲကအရုပ်လို စစ်အာဏာရှင်တို့၏ ထင်ရာပြုမူခြင်းကို ငုံ့ခံနေကြရမည်မဟုတ်။ ဒီမိုကရေစီနှင့် လူ့အခွင့်အရေးများ တစုံတရာအမြစ်တွယ်ရှင်သန်နေလောက် ပြီဖြစ်သည်။ ထိုစဉ်က အဖွဲ့ချုပ်၏ လွှတ်တော် ကိုယ်စားလှယ်များ မပြတ်သားခဲ့၍သာ ယနေ့စစ်အာ ဏာရှင်တို့၏ ဖိနှိပ်ချုပ်ချယ်၊ သွေးခွဲ သပ်လျှို၊ အနိုင်ကျင့်ခြင်းကို အမျိုးသားဒီမိုကရေစီအဖွဲ့ချုပ်နှင့်တကွ တနိုင်ငံလုံး ခံနေရသည်ဟု ဒီမိုကရေစီအတွက် အသဲကြားမှ မဲတပြားကိုပေးခဲ့သော ပြည်သူတဦးအနေ ဖြင့် ယူဆမိသည်။

ပြည်သူတို့ မျှော်လင့်ကြီးစွာစောင့်စားနေသော ရွေးကောက်ပွဲရလဒ်သည် ယ္ခုအချိန်တွင် စစ်အာဏာရှင်တို့၏ မုသားပင်လယ်တွင် မြုပ်ချီပေါ်ချီဖြင့် လွင့်မျောလျက်ရှိပေသည်။ ယ္ခုအခြေအနေတွင် တိုင်းရင်းသားလူမျိုးစုများအပါအဝင် ရဟန်းရှင်လူ ပြည်သူ ကျောင်းသားအားလုံးတို့သည် ညီညွတ်မှု၊ သွေးစည်းမှုအပြည့်ဝဖြင့် အမျိုးသားဒီမိုကရေစီအဖွဲ့ချုပ်၏ ပြည်သူ့လွှတ်တော်ပေါ်ပေါက်ရေး ကြိုးပမ်းမှုကို ဝိုင်းအုံအားပေးရန် အထူးလိုအပ်လှသည်။ ဤသို့မဟုတ်ခဲ့လျှင် မြန်မာပြည်သူလူထုသည် စစ်အာဏာရှင်တို့၏ ကျေးကျွန်နိုင်ငံသားများဘဝသို့ရောက်ကုန်မည်မှာ သေချာသည်။

စစ်အာဏာရှင်များနှင့် အပေါင်းအပါ ငွေရှင်ကြေးရှင်အသိုင်းအဝိုင်းမှ သားသမီးများသည် နိုင်ငံခြားတိုင်းပြည်များတွင် ခေတ်မီ ပညာရပ်များကို သင်ယူနေကြသည်။ စစ်အာဏာရှင်တို့၏ ထား ရာနေ၊ စေရာသွား၊ ခိုင်းတာလုပ်၊ ကျိုးနွံစွာ နာခံမည့် အသိုင်းအဝိုင်းမှ သားသမီးများကို စစ်တပ်က သီးသန့်ဖွင့်သော တက္ကသိုလ်၊ ကောလိပ်၊ သင်တန်းကျောင်းများတွင် ငယ်မွေးခြံပေါက်များအဖြစ် သီးသန့် လေ့ကျင့်သင်ကြားပေးသည်။ တချိန်တည်းမှာပင် ပြည်သူလူထုအများစုကြီး၏ သားသမီးများအတွက် အထက်တန်းပညာသင်ယူရာ တက္ကသိုလ်၊ ကောလိပ်များကိုမူ ယနေ့အထိ ပြန်လည်ဖွင့်လှစ်၍ မပေးဘဲ လူငယ်ကျောင်းသားတို့၏ဘဝကို နင်းချေပစ်နေသည်။ အနာဂတ်တွင် စစ်အာဏာရှင် အသိုင်းအဝိုင်း၏ အခိုင်းခံ ပညာမဲ့လူတန်းစားများဖြစ်သွားအောင် တမင်ရည်ရွယ်၍ ယ္ခုကဲ့သို့ ပြုလုပ်ထားခြင်းဖြစ်သည်။

အမျိုးသားစီးပွားရေးကို ထူထောင်ရာတွင်လည်း စစ်အာဏာရှင်တို့သည် အရွယ်အစားအမျိုးမျိုးရှိသော စီးပွားရေးလုပ်ငန်းများကို အမျိုးသားထုအတွင်း မျှမျှတတထွန်းကားတိုးတက်အောင် လုပ်ခြင်းမျိုးမဟုတ်ဘဲ ၄င်းတို့နှင့် ‘ပုလင်းတူ ဗူးဆို့’ဖြစ်သော လူတစု၊ လူတချို့ကိုသာရွေးချယ်၍ စီးပွားရေးလုပ်ပိုင်ခွင့်များ ပုံအောပေးထားပြီး အကျိုးအမြတ်များကို စစ်အာဏာရှင်အသိုင်းအဝိုင်းနှင့် စီးပွားရေးအသိုင်းအဝိုင်းတို့ မျှဝေခံစားနေကြသည်။ ပြည်သူလူထု တရပ်လုံးမှာမူ ၄င်းတို့၏အခိုင်းအစေ အစွယ်အပွားများဘဝဖြင့် ဝမ်းစာရေးအတွက် တနေကုန် တနေခမ်း ပင်ပန်းဆင်းရဲစွာ ရုန်းကန် စားသောက်ကြရသည်။

လယ်ယာစိုက်ပျိုးရေးကဏ္ဍတွင်လည်း တနိုင်ငံလုံးတွင် ပျံ့နှံ့နေထိုင်သော လူများစု တောင်သူလယ်သမားတို့၏ သမားရိုးကျ စိုက်ပျိုးရေးအား ခေတ်မီအောင်ပံ့ပိုးကာ ငွေအင်အား၊ ပစ္စည်းအင်အား ထောက်ပံ့လျက် ကျေးလက်ဒေသမကျန် စီးပွားရေး တိုးတက်ကောင်းမွန်အောင် လုပ်ရမည့်အစား၊ စစ် အာဏာရှင်များစိတ်ကြိုက် ငွေရှင်ကြေးရှင် အသိုင်းအဝိုင်းတခုအား မြေလွတ်မြေရိုင်း ဖော်ထုတ်လုပ် ကိုင်ခွင့် ပေးသည်ဟုဆိုကာ တောင်သူလယ်သမားတို့၏ ဓါးမဦးချမြေအချို့နှင့် ကျွဲ၊ နွားစားကျက်မြေ အချို့ကိုပါ မတရားသိမ်းယူလုပ်ပိုင်ခွင့်များ ပေးထားသည်။ တောင်သူလယ်သမား အများစုကြီးမှာ ၄င်း ငွေရှင်ကြေးရှင်တို့၏ အစွယ်အပွား၊ မြေကျွန်၊ ယာကျွန်၊ သူရင်းငှါး၊ လယ်ယာလုပ်သားဘဝသို့တဖြေးဖြေးရောက်ကုန်ကြပေပြီ။

စစ်အာဏာရှင်တို့သည် တိုင်းရင်းသားလူမျိုးစု လက်နက်ကိုင်အဖွဲ့အစည်းအချို့နှင့် အပစ်အ ခတ်ရပ်စဲထားကာ ထိုအဖွဲ့အစည်းများမှ ခေါင်းဆောင်ပိုင်းအချို့အား ‘တနယ်မြေ၊ တဗိုလ်တမင်း’ အဖြစ် ကိုယ်ကျိုးရှာ ဗိုလ်ကျစိုးမိုးပိုင်ခွင့် ပေးထားသည်။ ဤသို့ ပြုလုပ်ထားခြင်းမှာ တိုင်းရင်းသားများ၏ နိုင်ငံရေးပါတီများ၊ နိုင်ငံရေးအင်အားစုများ၊ နိုင်ငံရေး နိုးကြားမှုများ၊ နိုင်ငံရေး တောင်းဆိုသူများနှင့် စည်းလုံးညီညွတ်မှုများကို ယုတ်လျော့ပျက်ပြားသွားစေရန် ကောက်ကျစ်စွာ အချိုသပ်၍ စီမံဆောင်ရွက် ထားမှုပင်ဖြစ်သည်။

တပြိုင်နက်တည်းတွင် အခြေအနေမဲ့၊ ပညာမဲ့၊ အတွေးအခေါ်မဲ့၊ စာရိတ္တပျက်၊ ခိုင်းတိုင်းလုပ်၊ ကလေကချေ အများစုကြီးကို အခြေခံဖွဲ့စည်းထားသော ကြံ့ဖွတ်အဖွဲ့အစည်းအား လူမှုရေးအဖွဲ့အစည်းဟု လိမ်လည် အမည်တပ်လျက် စိတ်ဓါတ်ရေးရာ တည်ကြည်မှုကင်းမဲ့သော၊ ကိုယ်ကျိုးရှာ လူလည်၊ လူနပ်၊ လူတတ်အချို့ကို အလယ်အလတ် ခေါင်းဆောင်ပိုင်းအဖြစ် ခြယ်လှယ်ဖောက်ပြန်ခွင့်ပေးထားရင်း ယင်း ကြံ့ဖွတ်အဖွဲ့ကို စစ်အာဏာရှင်တို့က လိုသလို အသုံးချနိုင်အောင် မှိုင်းတိုက်ထားပေသည်။ ထို့အပြင် စစ်ထောက်လှမ်းရေးများကို အသုံးပြုပြီး တနိုင်ငံလုံးအား အကြောက်တရား လွှမ်းဖုံးအောင် တမင်ဖန်တီးထားသည်။

တဖန် အာဏာသိမ်းစစ်အာဏာရှင် ကြားပေါက်အစိုးရက လုံးဝလုပ်ခွင့်မရှိသော နိုင်ငံတော် ဖွဲ့စည်းအုပ်ချုပ်ပုံ အခြေခံဥပဒေ ရေးဆွဲရေးကိစ္စကိုလည်း မျက်နှာပြောင်တိုက်၍ သိက္ခာမဲ့စွာဖြင့် ဇွတ်အဓမ္မ အားထုတ်လုပ်ကိုင်နေကြသည်။ ယင်းအခြေခံဥပဒေ၌ အုပ်ချုပ်ရေးအာဏာ၊ ဥပဒေပြုရေး အာဏာ၊ တရားစီရင်ရေး အာဏာနှင့်တကွ နိုင်ငံရေး ဦးဆောင်အခန်းကဏ္ဍကိုပါ စစ်တပ်က ပါဝင် စွက်ဖက်ချုပ်ကိုင်နိုင်မှုကို တရားဝင်ထည့်သွင်းရန် စစ်အာဏာရှင်တို့က ကြံစည်နေသည်။

အမှန်စင်စစ်အားဖြင့် စစ်အာဏာရှင်တို့သည် ဦးနှောက်ပျက်လျက် ခေတ်နောက်ပြန်ဆွဲကာ ကြီးနိုင် ငယ်ညှဉ်းသော စစ်ဝါဒီ မြေရှင်ပဒေသရာဇ်အာဏာရှင်စနစ်ကို ထူထောင်ရန် ကြိုးပမ်းနေခြင်း ဖြစ်သည်။

မည်သို့ပင်ဖြစ်စေ စစ်အာဏာရှင်တို့၏အကြံအစည်သည် မည်သည့်နည်းနှင့်မျှ မအောင်မြင်နိုင်ချေ။ အဘယ်ကြောင့်ဆိုသော် စစ်အာဏာရှင်တို့ကိုယ်တိုင်ပင် (၁၉၉ဝ)ပြည့်နှစ်က ပါတီစုံဒီမိုကရေစီ ရွေးကောက်ပွဲကြီး ကျင်းပပေးခဲ့ပြီးဖြစ်သည်။ အမျိုးသား ဒီမိုကရေစီအဖွဲ့ချုပ်က အနိုင်ရထားပြီးဖြစ် သည်။ ၄င်းတို့၏ ဥပဒေပြဌာန်းချက်နှင့်အညီ အမျိုးသားဒီမိုကရေစီအဖွဲ့ချုပ်သည် တရားဝင်နိုင်ငံရေးပါ တီဖြစ်သည်။ အဖွဲ့ချုပ်၏ တရားဝင်လုပ် ရပ်တည်မှုကို မည်သို့မျှဖျက်ဆီး၍မဖြစ်နိုင်။ ရွေးကောက်ပွဲရ လဒ်ကို စစ်အာဏာရှင်တို့ ပယ်ဖျက်ပစ်ချင်၍မရနိုင်။ တချိန်တွင် ပြည်သူ့လွှတ်တော် ခေါ်ယူဖွဲ့စည်းပေးရမည်မှာ စစ်အာဏာရှင်တို့ မရှောင်သာသောအလုပ်ဖြစ်သည်။ တိုင်းပြည်အား ဒီမိုကရေစီနိုင်ငံအဖြစ် ပုံဖော်နေသည်ဟု စစ်အာဏာရှင်တို့ကိုယ်တိုင် နိုင်ငံတကာမျက်နှာစာတွင် မကြာမကြာ တစာစာပြောနေရသည်။ ယနေ့ကမ္ဘာကြီးသည် ရွာကြီးသဖွယ်ဖြစ်ကာ ကမ္ဘာလွှမ်းပတ်ဆက်စပ် ဖြစ်ပေါ်မှုကို မည်သည့်နိုင်ငံမျှ မရှောင်ရှားနိုင်။ သတင်းနည်းပညာသည် (၂၁)ရာစု၌ ကမ္ဘာ့နိုင်ငံအသီးသီး၏ အသက်ဝိဉာဉ်ဖြစ်သည်။ ကမ္ဘာ့သမိုင်းရေစီးသည် ဒီမိုကရေစီရေစီးကြောင်းအတိုင်း စီးဆင်းနေသည်။ (၂၁)ရာစုသည် ဒီမိုကရေစီနှင့် လူ့အခွင့်အရေးရာစုဖြစ်သည်။ ထို့ကြောင့် စစ်အာဏာရှင်တို့ မိုက်ချင်တိုင်း မိုက်ခွင့်မရှိ။ ရူးချင်တိုင်း ရူးခွင့်မရှိချေ။

သို့သော် တိုင်းရင်းသားလူမျိုးစုများအပါအဝင် ပြည်သူလူထုတရပ်လုံးသည် ပေါ့ပေါ့ တန်တန် နေရန်မသင့်ချေ။ ကြောက်ရွံ့နေရန် မသင့်ချေ။ (၁၉၉ဝ)ပြည့်နှစ်က မိမိတို့ကိုယ်တိုင် မြန်မာနိုင်ငံကို ဒီမိုကရေစီနိုင်ငံဖြစ်လာရန်မျှော်မှန်း၍ အမျိုးသားဒီမိုကရေစီအဖွဲ့ချုပ်ကို ပြတ်ပြတ်သားသား ဆန္ဒမဲပေးခဲ့ပြီး ဖြစ်သည်။ ထိုစဉ်က တိုင်းသူပြည်သားတို့၏ ရည်ရွယ်မျှော်မှန်းချက်ကို ယနေ့စစ်အာဏာရှင်များက ဟန့်တားနှောက်ယှက်ဖျက်ဆီးနေသည်။ သို့အတွက် ပြည်သူလူထုအားလုံးတွင် မိမိတို့ရည်မှန်းသော ဒီမိုကရေစီနိုင်ငံတော်ကြီး ပေါ်ထွန်းရေးအတွက် အမျိုးသားဒီမိုကရေစီအဖွဲ့ချုပ်နှင့် လက်တွဲပူးပေါင်းလုပ်ဆောင်ရန် တာဝန်ရှိပေသည်။ မိမိတို့အနေဖြင့် ဆန္ဒမဲပေးရုံသက်သက်မျှတာဝန်ရှိသည်မဟုတ်။ ရည်ရွယ်ချက်ပေါက်မြောက်သည်အထိ ပြုလုပ်ရန်တာဝန်ရှိသည်ကို နားလည်ရပေမည်။ အကယ်၍ ပြည်သူ လူထုအနေဖြင့် အကြောက်တရားလွှမ်းမိုးပြီး တာဝန်ရှောင်ကာ ပေါ့ပေါ့လျော့လျော့ ပြုလုပ်နေမည်ဆိုလျှင် စစ်အာဏာရှင်တို့က ဒီမိုကရေစီနိုင်ငံဖြစ်ပေါ်ရန် လမ်းခင်းနေပါသည်ဟု မျက်နှာပြောင်တိုက် ပြောဆိုကာ နောက်ထပ်အနှစ်(၁ဝဝ)မက တိုင်းပြည်အား အနိုင်ကျင့်အုပ်ချုပ်ရန် အားထုတ်မည်မှာ ဧကန်ဖြစ်သည်။ သို့အတွက် တိုင်းရင်းသားလူမျိုးစုအားလုံးနှင့်တကွ အမျိုးသားထုတရပ်လုံးသည် ဒီမိုကရေစီနိုင်ငံတော်သစ်ကြီး အမြန်ဆုံးပေါ်ထွန်းရေးအတွက် လက်တွေ့ကျကျ လက်တွဲဆောင်ရွက်သင့်ပြီ ဖြစ်ကြောင်း တင်ပြလိုက်ပါသည်။ ။

မဲဆန္ဒရှင် ပြည်သူတဦး

No comments:

Post a Comment