ညွန့်ပေါင်းသတင်းလွှာ။ ပုလဲသွယ် နိုင်ငံရေးစာမျက်နှာ။ တင်ပြ-ဆွေးနွေး-ရေးသားချက်များ။ ယမုန်နာ ဆေးခန်း။ ပြည်ထောင်စုအရေး။ ဒေါက်တာတင့်ဆွေ၏ စာများ။ My writings ၁၉၉၀ ရွေးကောက်ပွဲ။

Monday, March 2, 2009

လူထုဆန္ဒကို ရိုသေကြပါစို့- ဒီမိုကရေစီတိုက်ပွဲဝင် ရဲဘော်တဦး

ပြည်သူ့လွှတ်တော်ကိုယ်စားပြုကော်မတီ ၏ ရွေးကောက်ပွဲ (၁ဝ)နှစ်မြောက် အထိမ်းအမှတ်စာအုပ်မှ ကောက်နုတ်စာ။

သက္ကရာဇ်(၂ဝဝဝ)ပြည့်နှစ် မေလ(၂၇)ရက်နေ့ဆို ပါတီစုံဒီမိုကရေစီ အထွေထွေရွေးကောက် ပွဲကြီး ကျင်းပပြီးစီသည်မှာ (၁ဝ)နှစ်တင်းတင်းပြည့်ပြီဖြစ်ပါသည်။

ဤရွေးကောက်ပွဲအား မည်သည့်အတွက်ကြောင့် ကျင်းပခဲ့ရသနည်း။ ဤရွေးကောက်ပွဲ ကျင်းပခြင်းကြောင့် ပြည်သူလူထုသည် မည်သို့သောအကျိုးကျေးဇူး ရရှိခံစားနေရပါသနည်း။ နောင် လာလတံ္တ့သောကာလများ၌လည်း မည်သို့သောအကျိုးကျေးဇူး ရရှိခံစားအံ့နည်း။ (၁၉၉ဝ) ပြည့်နှစ် ပါတီစုံဒီမိုကရေစီအထွေထွေရွေးကောက်ပွဲ၏ အတိတ်၊ ပစ္စုန်ပ္ပန်၊ အနာဂတ်တို့ကို လေ့လာ သုံးသပ် ကြည့်ရန် လိုအပ်ပါသည်။

(၉ဝ)ခုနှစ်ရွေးကောက်ပွဲသည် အာဏာပိုင်တို့က “မင်းမဲ့ဝါဒီတို့သောင်းကျန်းခဲ့သော ခေတ်ပျက်ကာလ”ဟု သမုတ်ခေါ်ဆိုခဲ့သော “ပြည်သူ့ဒီမိုကရေစီလှုပ်ရှားမှု အရေးတော်ပုံကြီး”၏ ရလဒ်ဖြစ်ပါသည်။ အတိတ်သမိုင်းကို ပြန်ပြောင်းသုံးသပ်ကြည့်ပါစို့။ နိုင်ငံ၏ နိုင်ငံရေး၊ စီးပွားရေး၊ လူမှုရေး အထွေထွေအကြပ်အတည်းဟူသော ပင်မအကြောင်းတရား (သို့) နိုင်ငံရေးလောင်စာ ယမ်းပုံပေါ်သို့ကျောင်းသားခေါင်းဆောင် ကိုဖုန်းမော်ကျဆုံးခဲ့ရသည့် ရန်ကုန်စက်မှုတက္ကသိုလ်ကျောင်းသားလှုပ်ရှားမှု ‘မီးပွား’ ကျရောက်ခဲ့သည့်အခါ ပြည်သူလူထု၏ နိုင်ငံရေး အပြောင်းအလဲအတွက် လှုပ်ရှားရုန်းကန်မှု သည် အရှိန်အဟုန်ကြောင့် မြန်မာ့ဆိုရှယ်လစ်လမ်းစဉ်ပါတီ အရေးပေါ်ပါတီညီလာခံအား (၁၉၈၈) ခုနှစ် ဇူလိုင်လ(၂၃)ရက်နေ့၌ စတင်ကျင်းပခဲ့ပါသည်။ အဆိုပါအရေးပေါ်ပါတီညီလာခံ၌ ပါတီဥက္ကဋ္ဌ ဦးနေဝင်းက “တပါတီစနစ်နှင့်ပါတီစုံစနစ် လူထုအား ကြိုက်နှစ်သက်ရာ ရွေးချယ်ခွင့်ပြုရန်” အဆိုပြုခဲ့ သည်ဆိုသော်လည်း အရေးပေါ်ညီလာခံက ၄င်းအဆိုပြုချက်အား ပယ်ချခဲ့ပါသည်။

ဤအရေးပေါ်မဆလ ပါတီညီလာခံအသစ် ရွေးချယ်တင်မြှောက်လိုက်သော ပါတီဥက္ကဋ္ဌ (နိုင်ငံတော်သမတ) ဖြစ်သူ ဦးစိန်လွင် သည် ပါတီစုံဒီမိုကရေစီစနစ်ဖြစ်ပေါ်နိုင်ခြင်း မရှိစေရန်အတွက် ပြည်သူအသက်ပေါင်း များစွာကို ရက် ရက်စက်စက်စတေး၍ ရှစ်လေးလုံးပြည်သူအရေးတော်ပုံကြီးကို ချေမှုန်းရန် ကြိုးစားခဲ့ပါသည်။ သို့သော် အောင်မြင်မှုမရခဲ့ပါ။ ဦးစိန်လွင်၏ သမတသက်တမ်းသည် (၁၆)ရက်သာ ကြာခဲ့ပါသည်။ ဦးစိန်လွင် ၏နေရာ၌ (၁၉၈၈)ခုနှစ် သြဂုတ်လ(၁၉)ရက်နေ့တွင် အစားထိုးခန့်အပ်ခဲ့သော သမတ ဒေါက်တာ မောင်မောင်သည်လည်း အစပထမ၌ ပါတီစုံဒီမိုကရေစီရွေးကောက်ပွဲ ကျင်းပရန်သဘောတူလက်ခံခဲ့ခြင်း မရှိပါ။ “ပြည်သူ့ဆန္ဒ လေ့လာစုံစမ်းရေးကော်မရှင်”ကိုသာ ဖွဲ့စည်းပေးခဲ့ပါသည်။ သို့သော် ပါတီစုံ ဒီမိုကရေစီစနစ်ကိုသာ လိုလားကြောင်း အခိုင်အမာဖေါ်ထုတ်ပြသခဲ့သော ပြည်သူ့ဆန္ဒကြောင့် (၁၉၈၈) ခုနှစ် စက်တင်္ဘာလ (၁ဝ)ရက်နေ့၌ ကျင်းပခဲ့သော မဆလအရေးပေါ်ပါတီညီလာခံက ပါတီစုံစနစ်ဖြင့် အထွေထွေ ရွေးကောက်ပွဲ ကျင်းပရန် သဘောတူခဲ့ရပါသည်။

မဆလပါတီသည် ပါတီစုံဒီမိုကရေစီအထွေထွေရွေးကောက်ပွဲ ကျင်းပရန် ၄င်းတို့ဆန္ဒအလျောက် ဆုံးဖြတ်ခဲ့ခြင်းမဟုတ်ပါ။ ပြည်သူတို့၏အသက်ပေါင်းများစွာဆုံးရှုံးခဲ့ရသော ပြည်သူ့ဒီမိုကရေစီလှုပ်ရှားမှု အရှိန်အဟုန်ကြောင့်သာ ပါတီစုံစနစ်ကိုလက်ခံရန် ဆုံးဖြတ်ခဲ့ကြခြင်းဖြစ်ပါသည်။ ထို့ကြောင့် ပါတီစုံ ဒီမိုကရေစီစနစ်သည် မဆလကသော်လည်းကောင်း၊ လက်ရှိ စစ်အာဏာပိုင်များကသော်လည်းကောင်း ပြည်သူလူထုအား ပေးသနားခဲ့သော “အခွင့်အရေး”မဟုတ်ပါ။ လူထုဒီမိုကရေစီ အရေးတော်ပုံကြီး၏ ရလဒ်ဖြစ်ပါသည်။

(၁၉၈၈)ခုနှစ် စက်တင်္ဘာလ(၁၁)ရက်နေ့၌ကျင်းပသော စတုတ္တအကြိမ် ပြည်သူ့လွှတ်တော် အစည်းအဝေးက “ပါတီစုံဒီမိုကရေစီအထွေထွေရွေးကောက်ပွဲ”အား သုံးလအတွင်းကျင်းပပေးမည်ဟု ဆုံးဖြတ်ခဲ့ပါသည်ိ။ သို့သော် ပါတီစုံဒီမိုကရေစီစနစ်အား ဟန့်တားပိတ်ဆို့နိုင်ရေးအတွက် ပြည်သူ့ အသက်ပေါင်းများစွာကို သတ်ဖြတ်ခဲ့သော မဆလပါတီ၏ ပါတီစုံဒီမိုကရေစီအထွေထွေရွေးကောက်ပွဲ ကြီးကြပ်မှုအပေါ် လူထုသည် မည်သို့ယုံကြည်ကိုးစားနိုင်မှာနည်း။ လူထုသည် တရားမျှတသော ပါတီ စုံဒီမိုကရေစီအထွေထွေရွေးကောက်ပွဲ ကျင်းပနိုင်ရေးအတွက် “ကြားဖြတ်အစိုးရဖွဲ့စည်းရေး”ကို ဆက် လက် တောင်းဆိုခဲ့ပါသည်။ မဆလပါတီကလည်း “ကြားဖြတ်အစိုးရ ဖွဲ့စည်းခြင်း”ကို လက်မခံခဲ့ပါ။ ဤနိုင်ငံရေးအကြပ်အတည်းကို အကြောင်းပြု၍ စစ်တပ်သည်။ “ပါတီစုံဒီမိုကရေစီ အထွေထွေရွေး ကောက်ပွဲ ကျင်းပပေးပါမည်”ဟူသောကတိဖြင့် အာဏာသိမ်းယူ၍ နဝတကို ဖွဲ့စည်းခဲ့ပါသည်။

ထို့ကြောင့် နဝတပေါ်ပေါက်လာခြင်းသည် ပါတီစုံဒီမိုကရေစီစနစ်အား ကိုယ်တိုင်ပုံဖေါ် တည်ဆောက်ရန်မဟုတ်ပါ။ ပါတီစုံဒီမိုကရေစီ စနစ်ကို ပုံဖေါ်တည်ဆောက်ပေးမည့် ပြည်သူ့ကိုယ်စားလှယ်များအား လူထုက ရွေးချယ်တင်မြှောက်နိုင်ရေးအတွက် ပါတီစုံဒီမိုကရေစီ အထွေထွေရွေးကောက်ပွဲ ကျင်းပပေးရန်အတွက်သာဖြစ်ပါသည်။ နိုင်ငံတော်အချုပ်အခြာအာဏာကို ကိုယ်စားပြုခွင့်ရှိသူမှာ “ပြည်သူလူထု”သာဖြစ်ပါသည်။ နိုင်ငံတော်၏ လက်နက်ကိုင်ဝန်ထမ်းအဖွဲ့အစည်းဖြစ်သော“စစ်တပ်” သည် နိုင်ငံ၏အချုပ်အခြာအာဏာကို ကိုယ်စားပြုပိုင်ခွင့်မရှိပါ။ (၁၉၈၈)ခုနှစ် စက်တင်္ဘာလ(၁၈)ရက် နေ့တွင်ထုတ်ပြန်ခဲ့သော နိုင်ငံတော်ငြမ်ဝပ်ပိပြားမှု တည်ဆောက်ရေးအဖွဲ့ ကြေညာချက်အမှတ်(၁/၈၈) တွင် ပါတီစုံဒီမိုကရေစီ အထွေထွေ ရွေးကောက်ပွဲကျင်းပပေးရေးအတွက် နဝတ ဖွဲ့စည်းခဲ့ခြင်းဖြစ်ကြောင်းကို အတိအလင်း ထုတ်ဖေါ်ခဲ့ပါသည်။

သို့သော် ယခုအခါ နဝတ/နအဖအာဏာပိုင်များသည် “စည်းကမ်းပြည့်ဝသော ပါတီစုံဒီမို ကရေစီစနစ်”အား ၄င်းတို့သည် တဆင့်ပြီးတဆင့်၊ အကောင်အထည်ဖေါ်နေပါသည်ဟု ကြွေးကြော်နေပါသည်။ ပါတီစုံဒီမိုကရေစီစနစ် တည်ဆောက်ရမည့် တာဝန်သည် မည်သူ၏ တာဝန်ဖြစ်ပါသနည်း။ (၁၉၉ဝ)ပြည့် ပါတီစုံဒီမိုကရေစီ အထွေထွေ ရွေးကောက်ပွဲ၌ ပြည်သူလူထုသည် မိမိတို့ပိုင်ဆိုင်သော နိုင်ငံတော်အချုပ်အခြာအာဏာအား ပြည်သူ့လွှတ်တော် ကိုယ်စားလှယ်များ(ဝါ) ပြည်သူ့လွှတ်တော်ကို လွှဲအပ်ပြီးဖြစ်သည်။ ထို့ကြောင့် ပါတီစုံဒီမိုကရေစီစနစ် တည်ဆောက်ရေး တာဝန်သည် လူထုက ရွေးချယ်ပြီးဖြစ်သော “ပြည်သူ့လွှတ်တော်” ၌သာရှိပါသည်။ နဝတ/နအဖ အာဏာပိုင်များ၏တာဝန် မဟုတ်ပါ။ တပ်မတော်သည် နိုင်ငံတော် အချုပ်အခြာအား ကိုယ်စားပြုပိုင်ခွင့်မရှိပါ။ နိုင်ငံတော်၏ ဝန်ထမ်းအဖွဲ့အစည်း ဖြစ်သော“တပ်မတော်”သည် လူထုက ပေးအပ်သော တာဝန်ဖြစ်သည်“နိုင်ငံတော်လုံခြုံရေးနှင့်ကာကွယ်ရေးတာဝန်”အား သီးသန့်ထမ်းဆောင်ခြင်းဖြင့်သာ “နိုင်ငံတော်၏ အချုပ်အခြာ အာဏာတည်တံ့ခိုင်မြဲရေးနှင့် ပြည်ထောင်စုမပြိုကွဲရေး”ကို စွမ်းဆောင်နိုင်မည်ဖြစ်ပါသည်။ တပ်မတော်သည် မိမိ၏တာဝန်လည်းမဟုတ်သော၊ ဆောင်ရွက်ပိုင်ခွင့်လည်းမရှိသော “အုပ်ချုပ်ရေး၊ ဥပဒေပြုရေး၊ တရားစီရင်ရေး”ကိစ္စရပ်များတွင် စွက်ဖက်ဆောင်ရွက်ခြင်းသည် တပ်မတော်၏ဖခင်ကြီး၊ အမျိုးသား ခေါင်းဆောင်ကြီးချမှတ်ခဲ့သော “စစ်တပ်သည် နိုင်ငံ၏အစေခံဖြစ်ရမည်။ နိုင်ငံသည်စစ်တပ်၏အစေခံ မဖြစ်စေရ”ဆိုသည့်အခြေခံမူအား ချိုးဖေါက်ခြင်းသာဖြစ်ပါသည်ိ။ “နိုင်ငံတော်အချုပ်အခြာ အာဏာသည် ပြည်သူလူထုထံမှ သက်ဆင်းစေရမည်”ဟူသောအခြေခံမူအား ရိုက်ချိုးခြင်းလည်း ဖြစ်ပါသည်။

နဝတ/နအဖအာဏာပိုင်များသည်“(၉ဝ)ပြည့်နှစ် ပါတီစုံဒီမိုကရေစီအထွေထွေရွေးကောက် ပွဲရလဒ် အကောင်အထည်ဖေါ်ရေး” နှင့်ပတ်သက်၍ သဘောထား ရိုးသားမှန်ကန်မှုမရှိပါ။ အောက်ပါ ကောက်နှုတ်ချက်အချို့က ဤအချက်ကို ရှင်းလင်းစွာဖေါ်ထုတ်ပြသနေပါသည်။
၁။ (က)“တချို့ကလည်း ရွေးကောက်ပွဲကအဓိကမဟုတ်ဘူး။ ဖွဲ့စည်းပုံအခြေခံဥပဒေအဓိကလို့ ပြောတာလည်းကြားရတယ်။ အစိုးရဖွဲ့ဖို့ ယာယီဖွဲ့စည်းပုံအခြေခံဥပဒေရေး၊ အာဏာလွှဲပြီး တော့မှဖွဲ့စည်းပုံအခြေခံဥပဒေကို အချိန်ယူရေးရမယ်လို့လည်း ပြောတာကြားရတယ်။ ဒါက တော့ကြိုက်တာလုပ်ကြပါ။”(ရွေးကောက်ပွဲမတိုင်ခင်၊ တော်လှန်ရေးနေ့ ၂၇-၃-၉ဝ နေ့ ၌ ပြောကြားသည့် ဗိုလ်ချုပ်မှူးကြီးစောမောင်မိန့်ခွန်း)
(ခ)“နိုင်ငံတော်အာဏာကိုရယူရေးအတွက် ယာယီဖွဲ့စည်းပုံအခြေခံဥပဒေရေးဆွဲ၍ အစိုးရ ဖွဲ့စည်းခြင်းကို မည်သည့် နည်းနှင့်မျှ လက်ခံမည်မဟုတ်သည့်အပြင်၊ ထိုသို့ဆောင်ရွက်ပါက ဥပဒေနှင့်အညီ ထိရောက်စွာအရေးယူမည်။” (ရွေးကောက်ပွဲအပြီး ၁၉၉ဝပြည့်နှစ် ဇူလိုင်လ(၂၇)ရက်နေ့၌ထုတ်ပြန်ခဲ့သော နဝတ ကြေညာချက်အမှတ် ၁/၉ဝ အပိုဒ် ၂၁)

၂။ (က) “ထို့ကြောင့်ယနေ့အခြေအနေတွင်ပြည်သူများကရွေးကောက်တင်မြှောက်လိုက်သော ကိုယ်စားလှယ်များသည် အနာဂတ်ဒီမိုကရေစီနိုင်ငံတော်ဖွဲ့စည်းပုံအခြေခံဥပဒေကိုရေးဆွဲကြ ရန်တာဝန်ရှိသည့်ပုဂ္ဂိုလ်များဖြစ်ကြသည်။” (နဝတ ကြေညာချက်အမှတ် ၁/၉ဝ အပိုဒ် ၁၂)(ခ) အမျိုးသားညီလာခံ၏ ပြောဆိုဆွေးနွေးလုပ်ဆောင်ချက်အားလုံးကို ကန့်သတ်ထိန်းချုပ် ဘောင်ခတ်လိုက်သော “အနာဂတ်နိုင်ငံတော်၏ အမျိုးသားနိုင်ငံရေးဦးဆောင်မှုအခန်းကဏ္ဍတွင် တပ်မတော်ပါဝင်ထမ်းဆောင်နိုင်ရေး”ဟူသောဦးတည်ချက်အား နဝတ/နအဖ အာဏာ ပိုင်များကသာ ချမှတ်ခဲ့ခြင်းဖြစ်ပါသည်။ လူထုကရွေးချယ်ခဲ့သော ပြည်သူ့လွှတ်တော်ကိုိယ် စားလှယ်များ၏ သဘောဆန္ဒပါဝင်ခဲ့ခြင်းလုံးဝ(လုံးဝ)မရှိပါ။
(ဂ) ရွေးချယ်တင်မြှောက်လိုက်သော ပြည်သူ့လွှတ်တော်ကိုယ်စားလှယ်များသည်အမျိုးသား ညီလာခံကိုယ်စားလှယ် အားလုံး၏(၁၅.၂ဝ)ရာခိုင်နှုန်းသာရှိသောကြောင့်ထာဝစဉ်အနည်းစု ဖြစ်နေသည်။ ပြည်သူ့လွှတ်တော်ကိုယ်စားလှယ်များသည် “အခြေခံဥပဒေ ရေးဆွဲနိုင်စွမ်း” မရှိပါ။ နဝတ/နအဖအာဏာပိုင်များက ခန့်အပ်သော အမျိုးသားညီလာခံ ကိုယ်စားလှယ်များ (၈၄.၈ဝ)ရာခိုင်နှုန်းကသာ“အခြေခံဥပဒေ ရေးဆွဲနိုင်စွမ်း” ရှိနေပါသည်။

၃။ (က) ပြည်သူ့လွှတ်တော်ရွေးကောက်ပွဲဥပဒေပုဒ်မ(၃)တွင် “လွှတ်တော်ကို မဲဆန္ဒနယ်များမှ ဤဥပဒေနှင့်အညီ ရွေးကောက်တင်မြှောက်လိုက်သော လွှတ်တော်ကိုယ်စားလှယ်များ ဖြင့်ဖွဲ့စည်းရမည်”ဟူ၍ပြဋ္ဌာန်းပါရှိသည်။ ယင်းပြဋ္ဌာန်းချက်နှင့်အညီလွှတ်တော်ခေါ်ယူဖွဲ့စည်း ခြင်းကို နိုင်ငံတော်ငြိမ်ဝပ်ပိပြားမှုတည်ဆောက်ရေးအဖွဲ့က ဆောင်ရွက်ပေးမည်။ (နဝတ ကြေညာချက်အမှတ် ၁/၉ဝ အပိုဒ် ၁၂)
(ခ) နဝတ/နအဖအာဏာပိုင်များသည် ရွေးကောက်ပွဲကျင်းပပြီးစီသည်မှာ (၁ဝ)နှစ်ရှိပြီ ဖြစ် သော်လည်း လွှတ်တော်အား ခေါ်ယူပေးခြင်းမရှိရုံသာမက မည်သည့်အချိန်တွင် လွှတ်တော် ခေါ်ယူနိုင်မည်ဆိုသည်ကိုလည်း ပြောဆိုနိုင်ခြင်း ပြောဆိုခြင်းမရှိပါ။ (၁ဝ)နှစ် ဆိုသော အချိန် ကာလသည် ပုံမှန်လွှတ်တော်သက်တမ်း နှစ်ဆက်မက ရှိနေပြီဖြစ်ပါသည်။ ၄င်းတို့ ဆောင်ရွက်ပေးရမည့်“အာဏာလွှဲပြောင်းပေးခြင်း”ကို ငြင်းဆန်းလျက်ရှိသော၊ ၄င်းတို့ ဆောင်ရွက်ပိုင်ခွင့်မရှိသော “နိုင်ငံတော်ဖွံ့ဖြိုးတိုးတက်ရေး”ဆိုသော လုပ်ငန်များအား လုပ် ဆောင်နေသည်။ နဝတ/နအဖအာဏာပိုင်များက “နိုင်ငံတော်ကို ပါးစပ်ဖြင့်ချစ်ခြင်း မဟုတ်”ဟုကြွေးကြော်နေခြင်းသည် ဂုဏ်သိက္ခာကင်းမဲ့သော လုပ်ရပ်သာဖြစ်ပါသည်။ နဝတ/နအဖ အာဏာပိုင်များ၏ ဖိနှိပ်ချုပ်ခြယ်မှုများကြောင့် ပြည်သူ့လွှတ်တော်ကိုယ်စား လှယ်များသည် လူထုကပေးအပ်လိုက်သော တာဝန်များကို ထမ်းဆောင်နိုင်ခွင့်မရှိသေခြင်း ဖြစ်သည်။ သို့သော် အမျိုးသားဒီမိုကရေစီအဖွဲ့ချုပ်၏ဦးဆောင်မှုအောက်၌ ပြည်သူ့လွှတ် တော်ကိုယ်စားလှယ်များသည် လူထုကပေးအပ်လိုက်သောတာဝန်ဝတ္တရားများကို ထမ်းဆောင်နိုင်ရေးအတွက် မိမိတို့ဘဝကို အနစ်နာခံ၍ အဆက်မပြတ်ကြိုးပမ်းလျက်ရှိပါသည်။

ဤကဲ့သို့နဝတ/နအဖအာဏာပိုင်များ၏ (၉ဝ)ပြည့်နှစ် ပါတီစုံဒီမိုကရေစီ အထွေထွေရွေး ကောက်ပွဲရလဒ်အား အကောင်အထည် ဖေါ်ပေးရန် ပျက်ကွက်မှုကြောင့် မြန်မာနိုင်ငံ၏ ပစ္စုပ္ပန်နှင့် အနာဂတ်အပေါ် မည်သို့သော အကျိုးသက်ရောက်မှုများ ကျရောက်နေပါသနည်း။

(၁၉၈၈)ခုနှစ် ပြည်သူ့ဒီမိုကရေစီအရေးတော်ပုံကြီး၌ ပြည်သူလူထုသည်တပါတီစနစ်ကို ဖြိုချခဲ့ပါသည်။ ပါတီစုံဒီမိုကရေစီစနစ်ကို လိုလားကြောင်း ဖေါ်ထုတ်ပြသခဲ့ပါသည်။ သို့သော် ပြိုကျသွားသော တပါတီ အုပ်ချုပ်ရေးစနစ်အစား “ပါတီစုံ ဒီမိုကရေစီစနစ်” အစားထိုးတည်ဆောက်နိုင်ခြင်းမရှိသေးပါ။ ထို့ကြောင့် မြန်မာနိုင်ငံ၏ အနာဂတ်သည် ပီပီပြင်ပြင်မရှိပါ။ အနာဂတ် ပီပြင်ရေရာမှုမရှိသော နိုင်ငံအပေါ် ပြည်သူလူထုနှင့်နိုင်ငံတကာက မည်သို့ယုံကြည် စိတ်ချနိုင်ပါသနည်း။ ဤသို့ပြည်သူလူထုနှင့် နိုင်ငံတကာ၏ ယုံကြည်စိတ်ချမှုကင်းမဲ့နေပါက “ခိုင်မာသော ဖွံ့ဖြိုးတိုးတက်မှု”ကို မည်သို့မည်ပုံ တည်ဆောက်နိုင်မှာနည်း။

ထို့ကြောင့် ခေတ်မီဖွံ့ဖြိုးတိုးတက်သော ပါတီစုံဒီမိုကရေစီနိုင်ငံတော်သစ် တည်ဆောက်ရေးအတွက် ပထမခြေလှမ်း(ဝါ) အခြေခံအုတ်မြစ်သည်“လူထုက ရွေးချယ်တင်မြှောက်လိုက်သည့် လူထု အစိုးရထံ နိုင်ငံတော်အချုပ်အခြာအာဏာလွှဲအပ်၍ လူထုနှင့်နိုင်ငံတကာ၏ ယုံကြည်စိတ်ချမှု တည် ဆောက်ရေး”ဖြစ်ပါသည်။ “နိုင်ငံတော်အချုပ်အခြာအာဏာသည် ပြည်သူလူထုထံမှ ဆင်းသက်စေရမည်”ဟူသော အခြေခံမူနှင့်ကိုက်ညီမှသာ ပြည်သူလူထုနှင့်နိုင်ငံတကာ၏ ယုံကြည်စိတ်ချမှုကို ရရှိနို်င်မည်ဖြစ်ပါသည်။ နဝတ/နအဖသည် ပြည်သူလူထုကို ကိုယ်စားပြုခွင့်မရှိသော ယာယီစစ်အစိုးရသာ ဖြစ်သောကြောင့် ပြည်သူလူထုနှင့် နိုင်ငံတကာ၏ယုံကြည်စိတ်ချမှုကို မည်သို့ရရှိနိုင်မှာနည်း။ နိုင်ငံ၏ အနာဂတ် မရေမရာဖြစ်ခြင်းကို ကိုင်တွယ်ဖြေရှင်းခြင်းမရှိပဲ ဖွံ့ဖြိုးတိုးတက်သည့် နိုင်ငံတော်သစ်ကြီး တည်ဆောက်မည်ဟုဆိုခြင်းသည်“လေထဲ တိုက်အိမ်ဆောက်ခြင်း”သာ ဖြစ်ပါသည်။ နိုင်ငံတော်ဖွံ့ ဖြိုး တိုးတက်ခြင်းကို ရှင်သန်းကြီးထွားစေသည့် အခြေခံအုတ်မြစ်ကို ပုံဖေါ်ဆောင်ရွက်ရန် ရှောင်လွှဲငြင်းဆန်နေသည့် နဝတ/နအဖ အာဏာပိုင်များတို့အား စဉ်ဆက်မပြတ် တောင်းဆိုလျက်ရှိပါသည်။ ကမ္ဘာ့ကုလသမဂ္ဂသည် “(၉ဝ)ခုနှစ်ရွေးကောက်ပွဲရလဒ်အကောင်အထည်ဖေါ်ပေးရေး” အတွက် နအဖ/နဝတ အာဏာပိုင်တို့အပေါ် စီးပွားရေးအရ ပိတ်ဆို့မှုအပါအဝင် ဒဏ်ခတ်အရေးယူ လျက်ရှိပါသည်။ မရေရာသော အနာဂတ်ကြောင့် မြန်မာနိုင်ငံ၌ နိုင်ငံခြား ရင်းနှီးမြုပ်နှံမှု ကျဆင်းလျက် ရှိပါသည်။

လူထုကိုတာဝန်ခံရသောအစိုးရစနစ်ကင်းမဲ့မှုကြောင့် အကျင့်ပျက်လာဘ်စားမှုနှင့် အလွဲလွဲ အချော်ချော်အုပ်ချုပ်မှုတို့အား ရှောင်လွဲ၍မရပါ။ ပြည်သူတို့၏ ရပိုင်ခွင့် အခွင့်အရေးများအား လေး စားလိုက်နာရန် နဝတ/နအဖအာဏာပိုင်များ၏ ပျက်ကွက်မှုကြောင့် မြန်မာနိုင်ငံအား ကမ္ဘာ့အလုပ်သမားအဖွဲ့ကြီးက အဖွဲ့ဝင်အခွင့်အရေးများ ရပ်ဆိုင်းထားရုံသာမက လိုအပ်သလိုအရေး ယူရန်ပြင်ဆင်လျက်ရှိပါသည်။ ကမ္ဘာ့အဖွဲ့အစည်းများစွာတို့က မြန်မာနိုင်ငံ၏ လူ့အခွင့်အရေးမှတ်တမ်း အပေါ် ဝေဖန်ပြစ်တင်ရှုတ်ချလျက်ရှိပါသည်။ ဤသို့သော မြန်မာနိုင်ငံ၏ ဂုဏ်သိက္ခာနှင့် အနာဂတ် အပေါ် ထိပါးပျက်စီးစေသော ဖြစ်ရပ်များသည်“(၉ဝ)ခုနှစ် ရွေးကောက်ပွဲရလဒ်အား အကောင်အထည် ဖေါ်ပေးရန်”ပျက်ကွက်ခြင်းဟူသော အကြောင်းတရားမရှိပါက ဖြစ်ပေါ်လာစရာ လုံးဝ(လုံးဝ) မရှိပါ။

နဝတ/နအဖအာဏာပိုင်များက“နိုင်ငံ၏ သမိုင်းနောက်ခံယဉ်ကျေးမှုနှင့် ဆီလျော်ကိုက်ညီမှု ရှိသော ဒီမိုကရေစီစနစ်ကို ကျင့်သုံးရမည်”ဟုကြွေးကြော်လျက်ရှိပါသည်။ နိုင်ငံ၏ အနာဂတ်ကို ဆုံး ဖြတ်ပိုင်ခွင့်ရှိသူမှာ ပြည်သူလူထုသာဖြစ်ပါသည်။ ပြည်သူလူထုသည် (၈၈)ခုနှစ်လူထုဒီမိုကရေစီအရေး တော်ပုံကြီး၌လည်းကောင်း၊ (၉ဝ)ပြည့်နှစ် ပါတီစုံဒီမိုကရေစီ အထွေထွေရွေးကောက်ပွဲ၌လည်းကောင်း “ပါတီစုံဒီမိုကရေစီစနစ်”ကိုသာလိုလားကြောင်း အခိုင်အမာဆုံးဖြတ်ပြီးဖြစ်ပါသည်။ ဤသို့အခိုင်အမာ ဆုံးဖြတ်ပြီးဖြစ်ပါလျက် ပြည်သူ့ဆန္ဒ၏အပေါ်မှနေ၍ နဝတ/နအဖအာဏာပိုင်များက အုပ်ချုပ်မှုပုံစံ ရွေးချယ်သတ်မှတ်လိုခြင်းသည် “နိုင်ငံတော်အချုပ်အခြာအာဏာသည် ပြည်သူလူထုမှ ဆင်းသက်စေ ရမည်” ဟူသောအခြေခံမူကို ရိုက်ချိုးခြင်းသာဖြစ်ပါသည်။

တဖန် နဝတ/နအဖအာဏာပိုင်များက“စည်းကမ်းပြည့်ဝသော ပါတီစုံဒီမိုကရေစီစနစ်အား လေ့ကျင့်ပျိုးထောင် တည်ဆောက်နေပါသည်”ဟု ကြွားလုံးထုတ်လျက်ရှိပါသည်။ ပါတီ၏ မူဝါဒသဘော ထားများကို တရားဝင်စာရွက်စာတမ်းပင် ထုတ်ဝေပိုင်ခွင့်မပြုသော၊ ပါတီစည်းရုံးရေးလုပ်ငန်းများ ဆောင်ရွက်ခွင့်မပြုသော၊ ပါတီကော်မတီအဆင့်ဆင့် ပြင်ဆင် တိုးချဲ့ ဖွဲ့စည်းခြင်းကို ခွင့်မပြုသော နဝတ/ နအဖအာဏာပိုင်များသည် ၄င်းတို့ဆောင်ရွက်ပေးရန်တာဝန်ရှိသော ဆောင်ရွက် ပေးမည်ဟုလည်း အခိုင်အမာကတိကဝတ်ပြုထားသော လူထုရွေးချယ်သည့်လူထုအစိုးရပေါ်ပေါက်ရေးကို ဆောင်ရွက်ပေး ခြင်းမရှိပါ။ သို့သော် နဝတ/နအဖအာဏာပိုင်များသည် ၄င်းတို့ဆောင်ရွက်ပိုင်ခွင့်မရှိသော ခေတ်မီဖွံ့ ဖြိုးတိုးတက်သည့် နိုင်ငံတော်တည်ဆောက်ရေးဟုဆိုသော လုပ်ငန်းအစီအမံများအား ၄င်းတို့ဆန္ဒ သဘောဖြင့်ဆောင်ရွက်လျက်ရှိပါသည်။ ဤသို့ဆောင်ရွက်နေခြင်းသည် ပြည်သူ့ဆန္ဒကို လျစ်လျူရှု ခြင်း၊ ပြည်သူ့ဆန္ဒကို ဆန့်ကျင်ခြင်းဖြစ်ပါသည်။

နဝတ/နအဖအာဏာပိုင်များ၏ ရွေးကောက်ပွဲရလဒ်အား အကောင်အထည်ဖော်ပေးရန် ပျက်ကွက်မှုသည် (၈)နှစ်ဆိုသောအချိန်ကာလ ကျော်လွန်မှသာ အမျိုးသားဒီမိုကရေစီအဖွဲ့ချုပ်သည် ပြည်သူလူထုက မိမိတို့ပေးအပ်လိုက်သော တာဝန်ဝတ္တရားများ ကျေပွန်နိုင်ရေးအတွက် ပြည်သူ့ လွှတ်တော်ကိုယ်စားပြုကော်မတီအား ဖွဲ့စည်းခဲ့ခြင်းဖြစ်ပါသည်။ ထို့ကြောင့် နိုင်ငံနှင့်ပြည်သူ့အကျိုးကို မငဲ့၊ ထိပ်တိုက်ရင်ဆိုင်ရေးလမ်းစဉ်ကို ချမှတ်နေသူသည် အမျိုးသားဒီမိုကရေစီအဖွဲ့ချုပ်မဟုတ်ပါ။ ၄င်း တို့ခေါ်ယူပေးရန် တာဝန်ဝတ္တရားရှိသည့် ပြည်သူ့လွှတ်တော်ခေါ်ယူကျင်းပရန် နှစ်ပေါင်းများစွာ ပျက်ကွက်နေသော နဝတ/နအဖအာဏာပိုင်များသာဖြစ်ပါသည်။

တပ်မတော်၏ အစဉ်အာကောင်းဆိုသည်ကို သတ္တုချ အနှစ်သာရထုတ်ကြည့်ပါက ပြည်သူ လူထုဆန္ဒအား ရိုသေလေးစားခြင်း၊ ပြည်သူ့ဆန္ဒနှင့်အညီဆောင်ရွက်ခြင်းသာဖြစ်ပါသည်။ နဝတ/နအဖခေါင်းဆောင်များအနေဖြင့် တပ်မတော်၏ အစဉ်အလာ၊ ဂုဏ်သိက္ခာကို အမှန် တကယ် ထိန်းသိမ်းလိုပါက ပြည်သူ့ဆန္ဒနှင့်အညီ ပြည်သူ့လွှတ်တော် ခေါ်ယူကျင်းပပေးရုံမှတပါးအခြား မရှိဆိုသည်ကို အလေးအနက် ထောက်ပြတိုက်တွန်းလိုပါသည်။ ။

ဒီမိုကရေစီတိုက်ပွဲဝင် ရဲဘော်တဦး

No comments:

Post a Comment