ညွန့်ပေါင်းသတင်းလွှာ။ ပုလဲသွယ် နိုင်ငံရေးစာမျက်နှာ။ တင်ပြ-ဆွေးနွေး-ရေးသားချက်များ။ ယမုန်နာ ဆေးခန်း။ ပြည်ထောင်စုအရေး။ ဒေါက်တာတင့်ဆွေ၏ စာများ။ My writings ၁၉၉၀ ရွေးကောက်ပွဲ။

Tuesday, March 3, 2009

အမျိုးသားဒီမိုကရေစီအဖွဲ့ချုပ် ရွေးကောက်ပွဲဝင်ရန်ဆုံးဖြတ်၍ ကော်မရှင်တွင်စာရင်းတင်သွင်းခြင်း

ပြည်သူ့လွှတ်တော်ကိုယ်စားပြုကော်မတီ ၏ ပြည်သူ့လွှတ်တော်ရွေးကောက်ပွဲ
(၁ဝ)နှစ်မြောက် အထိမ်းအမှတ်စာအုပ်


အမျိုးသားဒီမိုကရေစီအဖွဲ့ချုပ်အနေနှင့် စစ်အစိုးရမှ ရွေးကောက်ပွဲကျင်းပပေးမည့် နေ့ရက်ကို သတ်မှတ် ကြေညာခဲ့သော်လည်း စစ်အစိုးရ၏ တဖက်သတ်ရေးဆွဲထားသော ရွေးကောက်ပွဲဥပဒေအပေါ်တွင် ယုံကြည်မှုမရှိသည့် အားလျော်စွာ ရွေးကောက်ပွဲ ဝင်ရောက်ရေးအတွက် စဉ်းစားဆင်ခြင် သုံးသပ်ရပါတော့သည်။ ရွေးကောက်ပွဲပြီးပါက ပြည်သူ့လွှတ်တော်ခေါ်ယူပေးမည့်နေ့ရက်၊ အာဏာလွှဲပြောင်းပေးမည့် အစီအစဉ်များမပါသော ရွေးကောက်ပွဲဥပဒေနှင့် ရွေးကောက်ပွဲဝင်ရန်မှာ တရားမျှတမှု ကင်းမဲ့သော၊ တဖက်သတ်ကျသော ဥပဒေအောက်တွင် ဝင်ရောက် ယှဉ်ပြိုင်ရမည့် အနေအထားသို့ရောက်ရှိနေပါတော့သည်။ သို့သော် နောက်ဆုံးတွင် ပြည်သူလူထု၏ဆန္ဒကို အသိအမှတ်ပြု အလေးထားသည့်အနေဖြင့် ရွေးကောက်ပွဲဝင်ရန် (၂၅၊ ၉၊ ၉ဝ)ရက်နေ့တွင် ဆုံးဖြတ်ချက်ချခဲ့ပြီး အောက်ပါ သဘောထားများ ပါဝင်သော ကြေညာချက်ကို ထုတ်ပြန်ခဲ့ပါသည်။

“-ဒီမိုကရေစီစနစ်ကို ယုံကြည်သည့်အားလျော်စွာ၊ မြေပေါ်မြေအောက်လှုပ်ရှားမှု လမ်းစဉ်များနှင့် လက်နက်စွဲကိုင် လမ်းစဉ်များသည် မိမိတို့နိုင်ငံတွင် ဒီမိုကရေစီစနစ်တည်ဆောက် သည့် နည်းလမ်းများမဟုတ်ဟု အခိုင်အမာ ယုံကြည်သည်။”

“-ဒီမိုကရေစီစနစ် ထူထောင်ရန် နည်းလမ်းမှာ ဒီမိုကရေစီကိုယုံကြည်ကြသော ဒီမိုကရေစီစနစ်ကို ကျင့်သုံးမည်ဟု ခံယူကြသော အခြားနိုင်ငံရေးပါတီများ အဖွဲ့အစည်းများနှင့် အထွေထွေရွေးကောက်ပွဲတွင် ယှဉ်ပြိုင် အရွေးခံပြီး ဒီမိုကရေစီအနှစ်သာရဖြစ်သော လူထုဆန္ဒကို ခံယူမည်ဖြစ်သည်။ အချုပ်အခြာအာဏာသည် ပြည်သူများ၌ တည်သည်ဟူသော ဒီမိုကရေစီ အခြေခံအရ ပြည်သူလူထု၏ဆန္ဒသည်သာလျှင် အဆုံးအဖြတ်ဖြစ်ရပါမည်။”

“-ဤသို့သဘောထားခံယူချက်များကို လက္ခံထားသည့်အတိုင်း အမျိုးသားဒီမိုကရေစီအဖွဲ့ချုပ်သည် (၁၉၉ဝ)ပြည့်နှစ် မေလတွင်ကျင်းပမည့် ပါတီစုံဒီမိုကရေစီ အထွေထွေရွေးကောက်ပွဲတွင် ဒီမိုကရေစီစနစ်ကို တည်ဆောက်ရေးအတွက် ဒီမိုကရေစီ၏ အနှစ်သာရဖြစ်သော မြန်မာနိုင်ငံတွင် နေထိုင်လျက်ရှိကြသည့် တိုင်းသူပြည်သား လူထု၏ဆန္ဒကို အထူးလေးစား စွာခံယူမည်ဖြစ်ကြောင်း ကြေညာအပ်ပါသည်။”

၎င်းနောက် အဖွဲ့ချုပ်ကိုယ်စားပြုမည့် ပြည်သူ့လွှတ်တော်ကိုယ်စားလှယ်လောင်းများရွေးချယ် မည့်မူကို ချမှတ်ပါသည်။

အဖွဲ့ချုပ်ပြည်သူ့လွှတ်တော်ကိုယ်စားလှယ်လောင်းများ စီစစ်ရွေးချယ်ခြင်းနှင့် မြို့နယ်စုကော်မရှင်တွင် ရွေးကောက်ပွဲ ယှဉ်ပြိုင်ရန် စားရင်းတင်သွင်းခြင်း

အဖွဲ့ချုပ်သည် ပြည်သူ့လွှတ်တော် ကိုယ်စားလှယ်လောင်းများ စီစစ်ရွေးချယ်ရန်အတွက် အောက်ပါ အခြေခံမူများကို ချမျတ်ခဲ့ပါသည်။
(က) ဦးတည်ချက်
၁) ပြည်သူ့လွှတ်တော်ကိုယ်စားလှယ်အများဆုံးရရှိရေးအတွက်ဦးတည်ကြိုးစားရန်။
၂) အစိုးရအဖွဲ့တွင်ဦးဆောင်န်ုင်မည့်အရည်အချင်းနှင့်ပြည့်စုံသောပုဂ္ဂိုလ်များပါဝင်ရန်။
၃) သက်ဆိုင်ရာ ဒေသပြည်သူတို့၏ ယုံကြည်လေးစားမှုခံရမည့် ပုဂ္ဂိုလ်များ ပါဝင်ရန်။
၎) အဖွဲ့ချုပ်၏ နိုင်ငံရေးနှင့် စည်းရုံးရေး ဦးဆောင်မှုများကို လိုက်နာဆောင်ရွက်မည့် ပုဂ္ဂိုလ်များ ပါဝင်ရန်။
၅) သက်ဆိုင်ရာပြည်နယ်အတွင်းရှိ ပြည်သူတို့ ယုံကြည်လေးစား လက်ခံနိုင်သော တိုင်းရင်းသားလူမျိုး ကိုယ်စားလှယ်များပါဝင်ရန်။
၆) အဖွဲ့ဝင်မဟုတ်စေကာမူ နိုင်ငံ၏အကျိုးကို စွမ်းစွမ်းတမံသယ်ပိုးဆောင်ရွက်နိုင်မည့် ပုဂ္ဂိုလ်များပါဝင်ရန်။

(ခ) ပါဝင်သင့်သောအမျိုးအစားများ
၁) ဒီမိုကရေစီလှုပ်ရှားမှုတွင်ပါဝင်ဆင်နìဲခဲ့သည့် လူကြီး၊ လူလတ်၊ လူငယ်ပုဂ္ဂိလ်များ၊ တတ်သိပညာရှင်များ၊ တောင်သူလယ်သမားများ၊ အလုပ်သမားများ၊ ကုန်သွယ်စီးပွား ပုဂ္ဂိုလ်များ၊ မြို့မိ/မြို့ဖနှင့် ရပ်မိရပ်ဖများ၊ နိုင်ငံရေး အစဉ်အလာရှိသူများ။
၂) အမျိုးသားဒီမိုကရေစီအဖွဲ့ချုပ်၏ မူဝါဒဖြစ်သော ရည်ရွယ်ချက်နှင့် လုပ်ငန်းစဉ်ကို ထောက်ခံသောပုဂ္ဂိုလ်များ။
၃) ရွေးကောက်ပွဲတွင် မိမိအတွက် စားရိတ် အကုန်အကျခံနိုင်မည့်ပုဂ္ဂိုလ်များ။
၎) အတိုက်အခံကိုယ်စားလှယ်လောင်းများအပေါ် ယှဉ်ပြိုင်အနိုင်ရရန် အလားအလာ ကောင်းသော ပုဂ္ဂိုလ်များ။
၅) မဲစာရင်းတွင်ပါဝင်သော ပုဂ္ဂိုလ်များ။

(ဂ) မပါဝင်သင့်သောအမျိုးအစားများ
၁) ဒီမိုကရေစီရေးနှင့်အဖွဲ့ချုပ်ခေါင်းဆောင်မှုကိုဆန့်ကျင်၍တိုက်ပွဲကိုစွန့်ခွာသွားနိုင်သူများ။
၂) ဆန့်ကျင်ဖက်အဖွဲ့အစည်းများက အခွင့်အရေးနှင့် ငွေကြေးကိုပေးကမ်းခြင်း၊ ခြိမ်းခြောက်ခြင်းဖြင့် ပြည်သူ့လွှတ်တော်ကိုယ်စားလှယ်အဖြစ်မှနှုတ်ထွက်သွားနိုင်သည့် အလားအလာရှိသူများ။
၃) ပြည်သူ့လွှတ်တော်ရွေးကောက်ပွဲဥပဒေ အခန်း(၅) ပုဒ်မ(၁ဝ)ပါအချက်များနှင့် ငြိစွန်းသူများ။

(ဃ) ဦးစားပေးရွေးချယ်ရေး
၁) ပထမဦးစားပေး၊ ဒီမိုကရေစီတိုက်ပွဲတွင်ပါဝင်ခဲ့၍ဒေသခံလည်းဖြစ်၊ လူကြိုက်လည်းများသော အရည်အချင်း လည်းရှိသောအခြေခံမှ ဆန္ဒရှိသူများ။
၂) ဒုတိယဦးစားပေး၊ အဖွဲ့ဝင်မဟုတ်စေကာမူ တိုင်းပြည်အတွက် လိုအပ်မည့်သူများ။
၃) တတိယဦးစားပေး၊ အဖွဲ့ချုပ်မှဆန္ဒရှိ၍ ဒေသသို့ပို့လွှတ်အရွေးခံလိုသူများ။
၎) စတုတ္တဦးစားပေး၊ အခြားအဖွဲ့အစည်းများမှ ပါဝင်သင့်သူများ။

မှတ်ချက်။
၁) ကိုယ်စားလှယ်လောင်းများ စီစစ်လျာထားရာတွင် မဲခွဲ၍ ဆုံးဖြတ်သည့်စနစ်ကို လုံးဝ(လုံးဝ) မကျင့်သုံးပဲ၊ အားလုံးလက်ခံသဘောတူနိုင်သော ပုဂ္ဂိုလ်များ ဖြစ်စေရမည်။ ညှိနှိုင်းသည့်တိုင်အောင် သဘောတူညီချက်မရရှိပါက မှတ်တမ်းတင်၍ ဗဟိုအဖွဲ့သို့အသေးစိတ်တင်ပြရမည်။
၂) အဖွဲ့က ရွေးချယ်လျာထားသူသည် တဖက်အတိုက်အခံများ၊ ကိုယ်စားလှယ် လောင်းများ၏အခြေအနေကို သိရှိပြီး ယှဉ်ပြိုင်နိုင်သူဖြစ်ရန် လိုအပ်ပါသည်။

အထက်ပါမူများအရ ပြည်သူ့လွှတ်တော် ကိုယ်စားလှယ်လောင်းများအား နိုင်ငံတဝှန်းလုံးရှိ မြို့နယ်များတွင် မဲဆန္ဒနယ်မြေအလိုက် အဖွဲ့ချုပ်၏ ပြည်သူ့လွှတ်တော် ကိုယ်စားလှယ်လောင်းများအား စီစစ်ရွေးချယ်ကြပါသည်။ ထိုသို့ရွေးချယ်ရာတွင် မြို့နယ်များတွင် ပြည်သူ့လွှတ်တော်ကိုယ်စားလှယ်လောင်း စီစစ်ရွေးချယ်သော အဖွဲ့အား မြို့မိမြို့ဖများနှင့်အတူဖွဲ့စည်း၍ ပြည်သူ့လွှတ်တော် ကိုယ်စားလှယ်လောင်း သုံးဦးအား ပထမဦးစားပေး၊ ဒုတိယ ဦးစားပေး၊ တတိယဦးစားပေးဟူ၍ ရွေးချယ်ပေးရပါသည်။ ထိုသို့ ကိုယ်စားလှယ်လောင်းများအား စီစစ်ရွေးချယ်မှုအား သက်ဆိုင်ရာ ပြည်နယ်နှင့်တိုင်း ပြည်သူ့လွှတ်တော် ကိုယ်စားလှယ်လောင်းများ ကြီးကြပ်ရေးအဖွဲ့များက ကြီးကြပ် ကွပ်ကဲရပါသည်။ ထိုမှတဆင့် ဗဟို ပြည်သူ့လွှတ်တော် ကိုယ်စားလှယ်လောင်းများ စီစစ်ရွေးချယ်ရေးအဖွဲ့သို့ တင်သွင်းပြီး ဗဟိုအဖွဲ့မှ ပြည်သူ့ လွှတ်တော်ကိုယ်စားလှယ်လောင်းအား အပြီးသတ် စီစစ်ရွေးချယ်ပေးပါသည်။ ထိုသို့စီစစ်ရွေးချယ်ခြင်းခံရသော ပြည်သူ့ကိုယ်စားလှယ်လောင်းများသည် မိမိတို့ရွေးကောက်ပွဲ ဝင်ရောက် ယှဉ်ပြိုင်မည့် မဲဆန္ဒနယ်မြေအလိုက် သက်ဆိုင်ရာမြို့နယ်စုကော်မရှင်တွင် ပြည်သူ့လွှတ်တော် ကိုယ်စားလှယ်လောင်း၏ အမည်စာရင်းကို တင်သွင်းခဲ့ပါသည်။ မြို့နယ်စုကော်မရှင်သည် နိုင်ငံရေးပါတီ အသီးသီးမှတင်သွင်းသော ကိုယ်စားလှယ်လောင်းစာရင်းများကို လက်ခံပြီးနောက်တွင် ကိုယ်စားလှယ်လောင်းများအား ရွေးကောက်ပွဲဥပဒေနှင့် ပတ်သက်၍ စီစစ်ပါသည်။ ထိုသို့ စီစစ်ပြီးနောက် ရွေးကောက်ပွဲတွင် ဝင်ရောက်ယှဉ်ပြိုင်မည့် ပြည်သူ့လွှတ်တော်ကိုယ်စားလှယ်လောင်းအဖြစ် လက်ခံကြောင်း ကြေညာပါသည်။

အဖွဲ့ချုပ်အထွေထွေအတွင်းရေးမှူး၏ ရွေးကောက်ပွဲဝင်ရောက်ခြင်းအပေါ် သဘောထားနှင့် ရွေးကောက်ပွဲကော်မရှင်တို့၏ ဆုံးဖြတ်ချက်များ

အမျိုးသားဒီမိုကရေစီအဖွဲ့ချုပ်အနေဖြင့် ရွေးကောက်ပွဲတွင် ဝင်ရောက်ယှဉ်ပြိုင်ရန် ဆုံးဖြတ် ပြီးနောက် နိုင်ငံတဝှမ်းလုံးရှိ မြို့နယ်များ၏ မဲဆန္ဒနယ်မြေအလိုက် ပြည်သူ့လွှတ်တော်ကိုယ်စားလှယ်လောင်းများ စီစစ်ရွေးချယ်၍ မြို့နယ်စု ကော်မရှင်တွင် စာရင်းတင်သွင်းသည့်အားလျော်စွာ အဖွဲ့ချုပ် အထွေထွေအတွင်းရေးမှူး ဒေါ်အောင်ဆန်းစုကြည်အား ရန်ကုန်တိုင်းဗဟန်းမြို့နယ် မဲဆန္ဒနယ်မြေအမှတ် (၁)တွင် ပြည်သူ့လွှတ်တော် ကိုယ်စားလှယ်လောင်းအဖြစ် (၂၉၊ ၁၂၊ ၈၉)ရက်နေ့တွင် ရန်ကုန်မြို့နယ် ကော်မရှင်အဖွဲ့ခွဲသို့၎င်း၏ ကိုယ်စားလှယ်မှတဆင့် အမည်စာရင်း တင်သွင်းခဲ့ပါသည်။

ဒေါ်အောင်ဆန်းစုကြည်ကိုယ်တိုင်ကလည်း-
“တိုင်းသူပြည်သားတို့၏ အမှန်တရားနှင့်ကိုက်ညီသော ဆောင်ရွက်ချက်များကို တတ်စွမ်းသရွေ့ ဖြည့်စွမ်း လိုသောကြောင့်လည်းကောင်း၊ ဒီမိုကရေစီလိုလားသော ပြည်သူလူထုကြီး၏ ဇွဲ၊ သတ္တိကို ဂုဏ်ပြုသောအားဖြင့်လည်းကောင်း၊ ရွေးကောက်ပွဲတွင် ပါဝင်ယှဉ်ပြိုင် လိုသူတဦးအဖြစ် အမည်စာရင်း တင်သွင်းပါသည်။”ဖော်ပြခဲ့ပါသည်။

သို့သော် ဒေါ်အောင်ဆန်းစုကြည်၏ အမည်စာရင်း တင်သွင်းခြင်းကို တိုင်းရင်းသားစည်းလုံး ညီညွတ်ရေးပါတီ၏ ဗဟန်းမြို့နယ် အမှတ်(၁)မဲဆန္ဒနယ်မြေမှ ပြည်သူ့လွှတ်တော်ကိုယ်စားလှယ်လောင်း ဖြစ်သူ ဦးလဘန်ဂရောင်နှင့် ဦးမြင့်သန်းတို့မှ ကန့်ကွက်ခဲ့ကြပါသည်။ ယင်းတို့၏ ကန့်ကွက်လွှာ၌ ဒေါ်အောင်ဆန်းစုကြည်သည် ပြည်သူ့လွှတ်တော် ဥပဒေပုဒ်မ ၈(ခ) ၁ဝ၁နှင့် ၁ဝ(ဇ)ငြိစွန်းသည်ဟု စွပ်စွဲ ဖော်ပြထားပါသည်။ ထိုသို့ကန့်ကွက်ခြင်းအပေါ် ရန်ကုန်တိုင်း မြို့နယ်စုကော်မရှင်အဖွဲ့ခွဲသည် ကန့်ကွက်သူတို့၏ စွပ်စွဲချက်နှင့် ဒေါ်အောင်ဆန်းစုကြည်၏ ရွေးကောက်ပွဲ ကိုယ်စားလှယ်တို့၏ ထုချေဖြေ ရှင်းချက်တို့ကို ကြားနာပြီးနောက် ဦးလဘန်ဂရောင်နှင့် ဦးမြင့်သန်းတို့၏ ကန့်ကွက်လွှာတို့ကို ပယ်ချခဲ့ပြီး ဒေါ်အောင်ဆန်းစုကြည်၏အမည်စာရင်းတင်သွင်းလွှာကို အတည်ပြုခဲ့ပါသည်။ သို့ရာတွင် တစည ကိုယ်စားလှယ် ဦးလဘန်ဂရောင်သည် ရန်ကုန်တိုင်းကော်မရှင်အဖွဲ့ခွဲသို့ပြည်သူ့လွှတ်တော် ရွေး ကောက်ပွဲဥပဒေ ပုဒ်မ(၂၄)အရ ရန်ကုန်မြို့နယ်စုကော်မရှင်အဖွဲ့ခွဲ၏ ဆုံးဖြတ်ချက်ကို မကျေနပ်ဟုဆိုကာ အယူခံတက်လျှောက်ခဲ့ပါသည်။

ရန်ကုန်တိုင်းကော်မရှင်အဖွဲ့ခွဲသည် (၁၅၊ ၁၊ ၉ဝ)ရက်နေ့၌ အမှုတွဲကို ကြည့်ရှုစစ်ဆေးပြီးနောက် ရန်ကုန်မြို့နယ်စု ကော်မရှင် အဖွဲ့ခွဲ၏ ဆုံးဖြတ်ချက်ကို ပယ်ဖျက်လိုက်ပြီး ကန့်ကွက်လွှာ တင်သွင်းသူ ဦးလဘန်ဂရောင်အား အနိုင်ပေးလိုက်ပါသည်။ ဒေါ်အောင်ဆန်းစုကြည် အား ရွေးကောက်ခံပိုင်ခွင့်မှ ပယ်ဖျက်ခြင်းသည် လွတ်လပ်၍ တရားမျှတမှုရှိသည့် အာဏာပိုင်တို့၏ ပြောကြားချက်အပေါ် အယုံအကြည်ကင်းမဲ့စေပါသည်။ ရွေးကောက်ပွဲမတိုင်မီ ထုတ်ပြန်ခဲ့သော ရွေးကောက်ပွဲဥပဒေမူကြမ်းအပေါ် အကြံတောင်းခံပြီး၊ အကြံပြုချက်များကို လျစ်လျူရှုကာ စစ်အစိုးရ၏ တဖက်သတ်ရေးဆွဲထားသော ရွေးကောက်ပွဲဥပဒေနှင့် အင်အားအကြီးဆုံးနှင့် လူထုထောက်ခံမှုအရှိဆုံး နိုင်ငံရေးပါတီ အဖွဲ့အစည်း၏ ခေါင်းဆောင်ဖြစ်သူ ဒေါ်အောင်ဆန်းစုကြည်အား မတရားချုပ်နှောင် ဖမ်းဆီးထားပြီး၊ ရွေးကောက်ပွဲ ဝင်ရောက် ယှဉ်ပြိုင်ခွင့်မပေးသော မတရားသည့်အပြုအမူများသည် မကြာမီ ဖြစ်ပေါ်လာတော့မည့် ရွေးကောက်ပွဲနှင့် ၄င်းရွေးကောက်ပွဲရလဒ်တို့အပေါ် လောင်းရိပ်ကျစေခဲ့ပါသည်။

ရွေးကောက်ပွဲတွင် ပါဝင်ယှဉ်ပြိုင်သည့် နိုင်ငံရေးပါတီအဖွဲ့အစည်းများနှင့် ပြည်သူ့လွှတ်တော်ကိုယ်စားလှယ်များ၏ အခြေအနေ

တနိုင်ငံလုံးတွင် ရွေးကောက်ပွဲကျင်းပမည့် မဲဆန္ဒနယ်စုစုပေါင်း (၄၈၅) နေရာရှိရာ အဖွဲ့ချုပ်က (၄၄၇)နေရာတွင် ဝင်ရောက်ယှဉ်ပြိုင်ရန် ဆုံးဖြတ်ခဲ့သည်။ အဖွဲ့ချုပ်၏ အဓိကမဟာမိတ်များဖြစ်ကြသော အမျိုးသားဒီမိုကရေစီပါတီနှင့် မျိုးချစ်ရဲဘော်ဟောင်းများအဖွဲ့တို့မှ မဲဆန္ဒနယ်(၃)နေရာ အသီးသီးတို့တွင် ဝင်ရောက်ယှဉ်ပြိုင် အရွေးခံခဲ့ပါသည်။ ပါတီစုံဒီမိုကရေစီအထွေထွေရွေးကောက်ပွဲ ကျင်းပရေးကော်မရှင်တွင် ရွေးကောက်ပွဲဝင်ရန် စာရင်းတင်သွင်းသည့်ပါတီ အဖွဲ့အစည်းစုစုပေါင်း (၉၃) ခုရှိခဲ့ပေသည်။ တနိုင်ငံလုံးတွင် ရွေးကောက်ပွဲ ဝင်ရောက်ယှဉ်ပြိုင်မည့် ပြည်သူ့လွှတ်တော် ကိုယ်စားလှယ်လောင်းအရေအတွက်မှာ(၂၂၉၆)ဦးဖြစ်ပြီး ၄င်းတို့အနက် အမျိုးသမီးလွှတ်တော် ကိုယ်စားလှယ်လောင်းများ အရေအတွက်မှာ(၈၄)ဦးနှင့် တသီးပုဂ္ဂလ လွှတ်တော်ကိုယ်စားလှယ်လောင်း အရေအတွက်မှာ (၈၇) ဦးဖြစ်ပါသည်။ အဖွဲ့ချုပ်မှ ဝင်ရောက်ယှဉ်ပြိုင်အရွေးခံသော အမျိုးသမီး ပြည်သူ့လွှတ်တော်ကိုယ်စားလှယ်လောင်း အရေအတွက်မှာ (၁၈)ဦး ဖြစ်ပါသည်။

ရွေးကောက်ပွဲအတွက် မဲဆွယ်စည်းရုံးစဉ်ကာလအခြေအနေ

အဖွဲ့ချုပ်သည် ရွေးကောက်ပွဲအောင်နိုင်ရေးကြိုးပမ်းရာတွင် ရည်ရွယ်ချက်(၅)ရပ်နှင့် လုပ်ငန်း စဉ်(၃)ရပ်ကို အခြေခံထား၍ ရွေးကောက်ပွဲ မဟာဗျူဟာကို ချမှတ်ဆောင်ရွက်ခဲ့ပါသည်။

ရည်ရွယ်ချက် (၅) ရပ်မှာ-
(က) အများပြည်သူတို့၏ ဆန္ဒနှင့်ကိုက်ညီ၍ အခြေခံလူ့အခွင့်အရေးများကို အာမခံမည့် စစ်မှန်သော ဒီမိုကရေစီအစိုးရ ဖြစ်ပေါ်လာစေရေး၊
(ခ) ရည်ရွယ်ချက်(က)ကို ဖြစ်ပေါ်လာစေရန် အဖွဲ့ချုပ်၏ ခေါင်းဆောင်မှုဖြင့် ပြည်သူလူထု ညီညွတ်မှုအင်အားကို အခြေခံ၍ စည်းကမ်းစနစ်ကျသော ဒီမိုကရေစီလှုပ်ရှားမှုကြီး ဖြစ်ပေါ်လာစေရန်။
(ဂ) ခေတ်အဆက်ဆက်၌လည်း မြန်မာနိုင်ငံသည် ပြည်သူလူထုဆန္ဒနှင့်အညီ ဒီမိုကရေစီနိုင်ငံရေးစနစ် ထွန်းကား၍ တည်တံ့ခိုင်မြဲသောပြည်ထောင်စုကြီးအဖြစ် တည်ထွန်းစေရေးအတွက် အုတ်မြစ်ချရန်။
(ဃ) အာဏာရှင်ဆန်၍ ပြည်သူလူထုကို ဖိစီးနှိပ်စက်မည့် နိုင်ငံရေးစနစ်မျိုး ပြန်လည်ထွန်းကားလာခြင်းမရှိစေရေးအတွက် ကြိုးပမ်းရန်။
(င) ကမ္ဘာတွင်ငြိမ်းချမ်းရေး၊ ဒီမိုကရေစီထွန်းကားရေးအတွက် နိုင်ငံတကာရှိ ငြိမ်းချမ်းရေး၊ ဒီမိုကရေစီ အင်အားစုများနှင့် ပူးပေါင်းဆောင်ရွက်ရန်တို့ဖြစ်ပါသည်။

လုပ်ငန်းစဉ်(၃)ရပ်မှာ
(က) ဒီမိုကရေစီအင်အားစုများနှင့် တညီတညွတ်တည်း လှုပ်ရှားနိုင်ရေးအတွက် စည်းရုံးဆောင်ရွက်ရန်။
(ခ) ပြည်သူလူထု၏ ဒီမိုကရေစီအခွင့်အရေးကို ထောက်ခံကာကွယ်ရန်နှင့်
(ဂ) အများပြည်သူတို့၏ ဆန္ဒနှင့် ကိုက်ညီသော စစ်မှန်သည့် ဒီမိုကရေစီအစိုးရ အကောင်အထည်ဖော်နိုင်ရန်အတွက် လွတ်လပ်၍တရားမျှတသော အထွေထွေရွေးကောက်ပွဲ ကျင်းပပေးနိုင်သည့် အခြေအနေများ ဖန်တီးပေးရန်ဟူ၍ ဖြစ်ပေသည်။

မဟာဗျူဟာအနေဖြင့်လည်း-
(က) အမျိုးသားဒီမိုကရေစီအဖွဲ့ချုပ်သည် မိမိ၏အကျိုးတခုတည်းကိုမကြည့်ပဲ ကျယ်ပြန့်သော ပြည်သူတရပ်လုံး၏ အကျိုးကိုရှေ့ရှုလျက် ရိုးသားသည့်ဦးဆောင်မှုဖြင့် ဒီမိုကရေစီလိုလားသူ အင်အားစုအားလုံးကို အခြေခံရန်။
(ခ) ရွေးကောက်ပွဲအောင်ရေးအတွက် နိုင်ငံရေးညီညွတ်မှုသည်သော့ချက်ဖြစ်သည်။ သို့သော် အပြောလွယ်သလောက် လက်တွေ့တွင် အခက်အခဲများစွာရှိသည်။ ထို့ကြောင့် ဒီမိုကရေစီ အဖွဲ့ချုပ်၏ မူဝါဒလုပ်ငန်းစဉ်များကို လက်ခံ ယုံကြည်သော အဖွဲ့များအားလုံးနှင့်(အထူးသဖြင့်) တိုင်းရင်းသားလူမျိုးစုအဖွဲ့များနှင့် ဆွေးနွေးညှိနှိုင်းပြီး စည်းလုံးညီညွတ်မှုကို တည်ဆောက်၍ အကောင်းဆုံးဖြစ်အောင် ပူးပေါင်းလှုပ်ရှားဖေါ်ဆောင်ရန်။
(ဂ) အလားတူပင် ဒီမိုကရေစီအတွက် အတွေးအခ်ါအယူအဆတွင်တူညီ၍နိုင်ငံရေးလမ်းစဉ် တို့တွင်လည်းတူညီသော အခြားအဖွဲ့အစည်းများနှင့်လည်း အတတ်နိုင်ဆုံး ညှိနှိုင်းဆွေးနွေးပြီး အခြေအနေပေးသည်နှင့်အမျှ ပူးပေါင်း လှုပ်ရှား ဖေါ်ဆောင်ရန်။
(ဃ) အမျိုးသားဒီမိုကရေစီအဖွဲ့ချုပ်အနေနှင့်သီးခြားရပ်တည်ဆုံးဖြတ်ချက်အကောင်အထည် ဖေါ်ခြင်းထက် အခြား ဒီမိုကရေစီလိုလားသူများနှင့် မိမိတို့၏မူဝါဒများကို ခံယူမည့်သူများပါ ပူးပေါင်းပြီး အထွေထွေရွေးကောက်ပွဲ အောင်နိုင်ရေး ကော်မတီများကို ကျယ်ပြန့်စွာဖွဲ့စည်းလျက် စုပေါင်း အကောင်အထည်ဖော်ရန်တို့ဖြစ်ပါသည်။

အဖွဲ့ချုပ် ရွေးကောက်ပွဲအောင်နိုင်ရေးအဖွဲ့များသည် အထက်ဖေါ်ပြပါ အဖွဲ့ချုပ်မှချမှတ်ထားသော ရွေးကောက်ပွဲ မဟာဗျူဟာနှင့် ရည်ရွယ်ချက်(၅)ရပ်နှင့်လုပ်ငန်းစဉ် (၃)ရပ်တို့ကို အခြေခံထား၍ ပြည်သူလူထုအား စည်းရုံး ဟောပြော ကြပါသည်။ ထို့အပြင် အဖွဲ့ချုပ်သည် ရွေးကောက်ပွဲအနိုင်ရရှိရေး ကြိုးပမ်းမှုအတွက် ရွေးကောက်ပွဲ အောင်နိုင်ရေး ကော်မတီများကို အဖွဲ့ချုပ်ဝင်ရောက်ယှဉ်ပြိုင်မည့် မဲဆန္ဒနယ်တိုင်းတွင် ဖွဲ့စည်းခဲ့ပါသည်။ အောင်နိုင်ငံရေး ကော်မတီများတွင် မြို့မိမြို့ဖ၊ ရပ်မိရပ်ဖများပါဝင်ကြပြီး ပြည်သူလူထုနှင့်အတူ စည်းရုံးရေး ဆင်းခဲ့ကြပါသည်။

ပြည်သူလူထုမှလည်း-
(၁) အဖွဲ့ချုပ်၏မူဝါဒလမ်းစဉ်များကိုနှစ်သက်သည်ဖြစ်၍လည်းကောင်း၊
(၂) အဖွဲ့ချုပ်ခေါင်းဆောင် ဒေါ်အောင်ဆန်းစုကြည်အား ထောက်ခံယုံကြည်အားကိုးသည်ဖြစ်၍ လည်းကောင်း၊
(၃) အဖွဲ့ချုပ်ကိုယ်စားလှယ်များ ပြောသည့်စကား၊ ပေးသည့်ကတိများကို လက်ခံသည်ဖြစ်၍ လည်းကောင်း၊
အဖွဲ့ချုပ်မှ ရွေးကောက်ပွဲအောင်နိုင်ရေး စည်းရုံးရေးဆင်းရာတွင် အလွန်မှပင် ထောက်ခံ အောင်မြင်မှုရရှိခဲ့ပါသည်။ ဤကဲ့သို့ဖြစ်ရခြင်းမှာ ဒီမိုကရေစီကို ပြည်သူများက မည်မျှလိုလားကြောင်းကို ဖေါ်ပြနေပါတော့သည်။ အဖွဲ့ချုပ်ကိုယ်စားလှယ်လောင်းများမှ ပြည်သူလူထုသို့ဖြန့်ဝေသော ကိုယ်ရေးမှတ်တမ်းစာရွက်များတွင် မိမိတို့၏ ပြည်သူလူထုအပေါ်ထားရှိသောသဘောထားနှင့် နိုင်ငံရေးခံယူချက်များကို ထည့်သွင်းဖေါ်ပြကြပါသည်။ ထိုသို့ ဖေါ်ပြကြရာတွင် မိမိတို့သည် ဒီမိုကရေစီအရေးနှင့် ပြည်သူလူထုကြီးမှပေးအပ်လိုက်သောတာဝန်များကို ကျေကျေပွန်ပွန် ထမ်းဆောင်မည်ဟူ၍လည်းကောင်း၊ အရေးတော်ပုံအောင်မြင်သည်အထိ ကြိုးပမ်း ဆောင်ရွက်သွားမည် ဟူ၍လည်းကောင်း၊ တပါတီအာဏာရှင်စနစ်ခေတ်က ပြည်သူ့လွှတ်တော်ကိုယ်စားလှယ်မျိုးမဟုတ်ပဲ ပြည်သူလူထုနှင့် တသားတည်း နေထိုင်လျက် ပြည်သူလူထု၏အကျိုးကို ဆောင်ရွက်သွားမည်ဟူ၍လည်းကောင်း ကတိကဝတ်များပေး၍ စည်းရုံး ခဲ့ကြပါသည်။

အဖွဲ့ချုပ်ဗဟိုမှလည်းကောင်း ရန်ကုန်တိုင်း၊ မန္တလေးတိုင်းနှင့် တိုင်းအတွင်းရှိမြို့နယ်များမှ လည်းကောင်း ဗိုလ်ချုပ် အောင်ဆန်း၏ ရင်ထိုးတံဆိပ်များ၊ ရုပ်ပုံကားချပ်များ၊ ဒေါ်အောင်ဆန်းစုကြည်၏ ဓါတ်ပုံ၊ ရင်ထိုး၊ ရုပ်ပုံကားချပ်များ၊ အဖွဲ့ချုပ်ဥက္ကဋ္ဌ ဦးတင်ဦး၏ရုပ်ပုံကားချပ်များ၊ ရွေးကောက်ပွဲ သင်္ကေတ ခမောက်ပုံရင်ထိုးများ၊ ခမောက်ပုံပါသော အင်္ကျီများ၊ ရွေးကောက်ပွဲအောင်နိုင်ရေး သီချင်းခွေများ၊ သံချပ်ခွေများ၊ အထိမ်းအမှတ်ပစ္စည်းများနှင့် အဖွဲ့ချုပ်သတင်းနှင့် ပြန်ကြားရေးအဖွဲ့မှ ထုတ်ပြန်သော မှတ်တမ်းလွှာများမှာ ပြည်သူလူထုအကြား အဖွဲ့ချုပ်အပေါ် ထောက်ခံသည့် သဘောထားများကို ထင်ရှားစွာပြသခဲ့ပေသည်။

No comments:

Post a Comment